Aprova hosi Konsellu Ministru, iha fulan Novembru tinan 2007, Polítika Nasionál Juventude ninia objetivu bo’ot ne’ebé hakerek iha parte konkluzaun dokumentu ne’e nian mak: “hadi’a kapasidade sira no koñesimentu klosan sira nian atu sira bele hala’o sira nia papél ho ativu atu implementa estratejia hirak kona-ba dezenvolvimentu sosiál no ekonómiku país ne’e nian”. Tarefa espesiál ida importante mak bainhira ita sura katak populasaun sorin balun timór nian iha otas menus liu tinan 30. Importánsia sai bo’ot tan ho faktu ida katak parte hosi populasaun ida ne’e ka’er ona papél ida bo’ot iha istória libertasaun no ukun-rasik-an nian no liu-liu tanba reprezenta futuru Nasaun ne’e nian.

Tanba ne’e mak, IV Governu Konstitusionál haka’as-an hela atu fó kondisaun no infra-estrutura hirak presiza atu haburas medida no atividade hirak bele promove móris di’ak klosan Nasaun foun ida ne’e nian.

“Polítika Nasionál Juventude Timor-Leste nian mak”, tuir ita bele lee iha ninia Preámbulu, “dokumentu ida ba da-uluk ne’ebé difini liña hirak sai orientasaun ba promosaun móris di’ak oin-oin klosan sira nian”.

Bazeia ba Peskiza Nasionál kona-ba Juventude Timor-Leste nian, iha estudu hirak kona-ba asuntu hirak sosiál, ekonómiku no demográfiku ne’ebé hala’o iha país ne’e no liu hosi konsulta bo’ot ida, Polítika Nasionál Juventude nian “hatudu vontade preokupasaun Estadu nian atu haburas kapasidade klosan sira nian, ohin no iha futuru, no atu mobiliza sira hodi fá apoiu ba dezenvolvimentu no hamenus móris ki’ak iha país ne’e”.

Liután vizaun no objetivu kona-ba dezenvolvimentu klosan sira nian, dokumentu ne’e mós hato’o kona-ba sira nia direitu no devér sira, papél hosi ema hirak intervein iha asuntu hirak kona-ba Juventude, estratejia hirak importante no mekanizmu hirak presiza ba ninia implementasaun.

Defini tiha ona estratéjian nen hirak importante, tuir Diretór-Jerál Sekretaria Estadu Juventude no Desportu, José Luís de Pádua Oliveira nian, esplika  : “Uluk nanain sei mobiliza klosan sira haree hosi kontestu móris komunidade nian; tuir mai, atu estabelese ligasaun entre edukasaun no realidade hafoin remata eskola; tuir fali, atu fó oportunidade empregu barak no di’ak liután ba klosan sira; ba dahaat, hanorin klosan sira lee no hakerek; dalimak, tulun klosan hirak móris ki’ak liu; no ikus liu, estratéjia importante ba daneen mak atu promove partisipasaun sívika klosan sira nian”.

 

Atu haree vídeo ida-ne’e, klik iha ne’e.