Ministra Solidariedade Sosiál no Inkluzaun (MSSI), Verónica das Dores, partisipa iha Sorumutuk Konsellu Komunidade Sosiukulturál ASEAN (ASCC, akrónimu iha lian inglés) ba da-31, ne’ebé realiza iha loron 24 fulan-marsu tinan 2024, iha Luang Prabang, iha Repúblika Demokrátika Populár Laos. Sorumutuk ne’e ho tema “ASEAN: Hasa’e Konektividade no Reziliénsia”. 

ASCC, hanesan pilár ida husi pilár tolu Komunidade ASEAN nian, ne’ebé dedika ba fortalesimentu no promosaun dimensaun sosiál, kulturál no umana husi kooperasaun entre paízes membrus, ho objetivu atu hadi’a kualidade moris sira-nia populasaun nian.

Iha sorumutuk ne’ebé sura ho partisipasaun husi Sekretáriu-Jerál ASEAN, Kao Kim Hourn no ministru sira husi área sosiál ASEAN no Timor-Leste nian, hanesan país observadór, ne’ebé diskute tendénsia emerjente, dezafiu no rekomendasaun sira iha definisaun Planu Estratéjiku ASCC nian, inklui dijitalizasaun, mudansa demográfika, alterasaun klimátika no envolvimentu ho parte interesante oin-oin. 

Ministra Verónica das Dores, lori Primeiru-Ministru Timor-Leste, Kay Rala Xanana Gusmão nia naran hato’o saudasoins no kongratulasoins espesiais ba Repúblika Populár Laos ba Prezidénsia ASEAN durante tinan 2024.

Governante ne’e afirma katak “Timor-Leste neineik hetan konfiansa no aprendizajen husi estadus-membrus ASEAN, kona-ba serbisu relasiona ho Planu Asaun ASEAN nian” no hato’o ninia “gratidaun ba espesialista sira ASEAN nian ba formasaun ne’ebé fornese ba funsionáriu governamentál nasionál sira, liuliu kona-ba sosiukulturál”. 

Iha sorumutuk ida ne’ebé dedikada ba melloria konektividade no reziliénsia, Ministra ko’alia-liu importánsia husi partilla dezafiu, lisaun ne’ebé aprende no prátika sira ne’ebé di’ak-liu entre Estadus-membrus SEAN, ne’ebé foka-liu kompromisu Timor-Leste nian atu kontribui ba diskusaun ida-ne’e.

Verónica das Dores, anunsia mós “formasaun ba komisaun eventuál ida iha Parlamentu Nasionál hodi monitoriza prosesu adezaun ba ASEAN”.

Ikusliu, Ministra afirma katak sorumutuk ida-ne’e nu’udar “oportunidade exelente ida hodi hasa’e konfiansa no kapasidade Timor-Leste nian iha asuntu ASCC no mós hodi hametin ita-nia rede rejionál ho Estadus-membrus ASEAN. Timor-Leste, iha ita-nia kualidade hanesan observadór, apoia tomak dokumentu rezultante ne’ebé aprova husi Estadus-membrus no kompromisu rejionál sira ba ninia implementasaun”. 

Durante Sorumutuk Konsellu Komunidade Sosiukulturál ASEAN ba da-31, partisipante sira identifika prioridades-xave iha área prinsipál rua: “Melloria Konektividade” no “Melloria Reziliénsia”. Relasiona ho Konektividade, nia destaka integrasaun ekonómika, sustentabilidade no transformasaun dijitál, aleinde papél krusiál ba kultura no artes. Kona-ba reziliénsia, ko’alia-liu planu estratéjiku, sentralidade ASEAN, kooperasaun ambientál, promosaun ba direitu feto no labarik nomos fortalesimentu setór saúde. Estadus-membrus hatudu apoiu totál ba Prezidénsia Laos no esperansa iha rezultadu pozitivu ba ASEAN, inklui ho implementasaun Perspetiva ASEAN kona-ba Indo-Pasífiku.

 

Vizita mós ami iha Facebook liuhusi www.facebook.com/portal.GOV.TL