Prezidénsia Konsellu Ministrus

  Portavós Governu Timor-Leste

IX Governu Konstitusionál

……………………………………………………………………………………………………………

Komunikadu Imprensa

Toleránsia pontu iha loron 28 fulan-marsu, tinan 2024, durante loron tomak

Konsidera katak, tuir alínea a) husi n. 2 artigu 7.º husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, prevee katak bele fó toleránsia pontu ba okaziaun data komemorativu ofisiál;

Konsidera katak tuir alínea b) husi n. 2 artigu 5-º husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abril, “Kinta-Feira Santa, nu’udar parte hosi loron komemorasaun páskua kristaun sira nian” hanesan data komemorativu ofisiál, ho data ne’ebé variavel;

Haree katak iha tinan ida-ne’e, Sesta-Feira Santa no Páskua hala’o iha loron 29 to’o  loron 31 fulan-marsu,

Hanoin katak selebrasaun relijioza “Kinta-Feira Santa” importánsia no signifikadu tebes ba fiar-na’in barak, ne’ebé baibain partisipa iha serimónias relijiozas ne’ebé hala’o iha tempu páskua.

Konsidera katak prátika ne’ebé molok ne’e hala’o ona, bazeia ba alínea b) hosi n. 2 artigu 5.º hosi lei refere;

Konsidera katak tuir dispostu iha alínea d) husi n. 6 artigu 7.º hosi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no 10/2023, loron 5 fulan-abríl, kompeténsia Primeiru-Ministru nian hodi fó toleránsia pontu ba “funsionárius no ajentes ministériu ka servisu sira ne’ebé depende ba sira, nune’e mós institutu no organizmu sira ne’ebé integra iha administrasaun indireta Estadu nian”;

Nune’e, tuir dispostu iha alínea a) husi n. 2 no iha alínea d) husi n. 6 artigu 7.º husi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no husi Lei n. 10/2023, loron 5 fulan-abríl, Primeiru-Ministru determina hanesan tuirmai:

1. Fó toleránsia pontu iha loron 28 fulan-marsu tinan 2024, durante loron tomak.
2. Despaxu ida-ne’e abranje ba funsionáriu, ajente no traballadór sira hotu ne’ebé hala’o atividade iha servisus administrasaun direta Estadu, tantu sentrál ka deskonsentradu sira, ka iha organizmu sira administrasaun indireta nian.
3. La inklui iha númeru anteriór rekursus umanus husi servisu públiku sira ne’ebé, tanba natureza atividades ne’ebé sira dezenvolve, tenke hala’o nafatin serbisu durante períodu ne’e.
4. Sein prejuizu ba kontinuidade no kualidade servisu públiku ne’ebé atu halo, dirijentes másimus husi servisu sira ne’ebé maka temi ona iha númeru anteriór, tenke fó dispensa ne’ebé hanesan ba devér asiduidade funsionáriu sira ne’e nian, iha loron seluk, ne’ebé sei determina bazeia ba oportunidade. REMATA