Ministériu Solidariedade Sosiál no Inkluzaun (MSSI), ho apoiu husi UNICEF Timor-Leste nian, lansa ona, iha loron 14 fulan-marsu tinan 2024, “Primero CPIMS+”, aplikasaun ‘web’ ida ba Jestaun Informasaun kona-ba Protesaun Infantíl no Jestaun Dijitál ba Kazu sira, hodi halo koordenasaun apoiu ba labarik vulneravel sira.

Iha serimónia ne’e, MSSI divulga mós relatóriu kona-ba Avaliasaun Nasionál ba Inisiativa Kapasitasaun Forsa Traballu Servisu Sosiál nian iha Timor-Leste, husi tinan 2016 to’o 2022, dokumentu ida ne’ebé fornese rekomendasaun sira hodi hadi’a serbisu asistente sosiál nian. 

Aplikasaun web “Primero” ne’e dezenvolve ona hodi ajuda prestadór servisu sosiál nian atu koordena apoiu ba labarik vulneravel sira. Sistema ne’e kontestualiza ona hodi bele uza iha senáriu oin-oin, inklui emerjénsia no sei simplifika jestaun kazu sira no fasilita akompañamentu labarik sira nian iha situasaun vulnerabilidade. Implementasaun “Primero” sura mós ho apoiu husi Governu Austrália no USAID. Ferramenta ida-ne’e hanesan komponente fundamentál ida iha reforsu sistema protesaun infantíl, ho istóriku komprovadu asisténsia nian ba programa sira iha prestasaun kuidadus ho kualidade ba labarik vulneravel sira no ba sira-nia família.

Iha ninia diskursu, Vise-Primeiru-Ministru fó-énfaze katak “atu jere sistema informasaun no jestaun ba kazu ne’ebé efikás, Governu IX, liuhusi MSSI, marka pasu importante ida hodi hametin sistema protesaun infantíl iha Timor-Leste liuhusi dijitalizasaun”.

Mariano Assanami Sabino rekoñese mós katak “violénsia kontra feto, labarik no ema vulneravel sira kontinua sai barreira ida ba dezenvolvimentu nasionál” no afirma katak “ho sistema ida ne’ebé dezenvolve husi MSSI, komunidade timoroan bele relata situasaun labarik, feto no ema vulneravel sira nian iha situasaun difikuldade hodi hetan kedas asisténsia”. 

Ministra Verónica das Dores, durante lansamentu aplikasaun ne’e, sente “kontente no orgullu, hanesan timoroan, tanba bele marka pasu importante ida tan ba nasaun, iha serbisu Programa no Sistema Protesaun ba Labarik no Joven sira iha Perigu, ho konkista inovadora ida-ne’e ba Timor-Leste”.

Reprezentante UNICEF iha Timor-Leste, Bilal Aurang Zeb Durrani afirma katak “laiha sistema ba jestaun kazu no enkamiñamentu ne’ebé sólidu no efisiente iha país ne’e, maka sei kontinua taka matan ba labarik barak ne’ebé hetan violénsia no abuzu. Tanba ne’e UNICEF felisita Governu Timor-Leste ba marku ida-ne’e kona-ba dijitalizasaun ba jestaun kazus hodi prevene no responde epizódiu violénsia, abuzu no prátika prejudisiál sira”.

Eventu ne’ebé akontese iha tempu hanesan ho selebrasaun Loron Traballu Sosiál ASEAN (15 fulan-marsu) ho Loron Mundiál Traballu Sosiál (19 fulan-marsu), sura mós ho prezensa husi Vise-Ministra Solidariedade Sosiál no Inkluzaun, Céu Brites, Prezidente Institutu ba Defeza Direitus Labarik nian (INDDICA, Sigla iha lian Portugés) Dinorah Granadeiro, reprezentante hosi liñas ministeriais no parseiru dezenvolvimentu sira.