Iha loron 14 fulan-marsu tinan 2024, iha Palásiu Governu, Dili, komisaun koordenadora realiza sorumutuk ida ba preparasaun vizita Sua Santidade, Papa Francisco nian mai Timor-Leste. Enkontru ne’e lidera husi Ministru Prezidénsia Konsellu Ministrus, Agio Pereira, nu’udar Koordenadór-Jerál Altu Nivel Institusionál ba vizita papál, konta ho prezensa husi membru Governu balu no reprezentantes husi instituisaun públika sira ne’ebé envolve iha misaun ida-ne’e. 
Ajenda ba sorumutuk ne’e inklui aprezentasaun programa vizita nian ne’ebé revee ona husi Vatikanu, nune’e mós informasaun sira kona-ba ekipa avansada husi Santa Sé sei to’o mai Timor-Leste, ne’ebé prevee ba fulan-juñu.
Durante sesaun ne’e, diskute pontu importante oioin, hahú husi preparasaun infraestruturas iha área misa nian iha Tasi Tolu, no haree liu ba projetu palku ne’ebé fornese husi Vatikanu, to’o ba deskrisaun detallada orsamentu ba preparativus vizita ne’e nian. 
Entre kestaun téknika oioin ne’ebé diskute iha sorumutuk ne’e, inklui aprezentasaun planu protokolár no análize ba preparativus iha nivel saúde no resposta emerjénsia nian.
Koordenadór-Jerál ne’e halo rezumu ba dezafiu prinsipál no kestaun fundamentál sira, hodi subliña importánsia husi koordenasaun ida ne’ebé forte no antesipasaun ba difikuldades ne’ebé bele mosu. 
Konsellu Ministrus, iha sorumutuk loron 28 fulan-fevereiru tinan 2024, delibera ona hodi autoriza despeza to’o montante dolar amerikanu millaun 12 hosi Fundu Kontinjénsia ba Komisaun Koordenadora hodi organiza atividades preparasaun ba vizita refere.
Iha sorumutuk semana ida-ne’e, Konsellu Ministrus aprova ona projetu Dekretu-Lei ida hodi kria Rejime Espesiál Aprovizionamentu ida ba vizita Papa Francisco mai Timor-Leste. Diploma ida-ne’e ho objetivu atu estabelese prosedimentu espesiál sira ba kontratasaun públika beins móveis, servisus no obras públikas ne’ebé relasiona ho organizasaun no seguransa ba vizita papál. Objetivu husi inisiativa ne’e atu halo formalidade no prazu sira sai fleksivel liu hodi garante efisiénsia no urjénsia iha preparasaun ba eventu istóriku ida-ne’e.
Iha loron 12 fulan-fevereiru liubá, Monseñór Marco Sprizzi hateten katak, maske “seidauk bele konfirma data”, “Governu Timor halo hela preparasaun ida ne’ebé di’ak-tebes” no “lori Santa Sé nia naran” agradese “ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”.
Aleinde Koordenadór-Jerál, sorumutuk ne’e konta mós ho partisipasaun husi Vise-Koordenadór-Jerál Altu Nivel Institusionál ba vizita Sua Santidade, Papa Francisco, Ministru Administrasaun Estatál, Tomás do Rosário Cabral, Ministru Negósius Estranjeirus no Kooperasaun, Bendito dos Santos Freitas, Ministra Saúde, Elia A. A. dos Reis Amaral, Ministru Obras Públikas, Samuel Marçal, Ministru Transportes no Komunikasoins, Miguel Marques Gonçalves Manetelu, Ministru Defeza, Donaciano do Rosário Gomes, Ministru Interiór, Francisco da Costa Guterres, Ministru Planeamentu no Investimentu Estratéjiku, Gastão Francisco de Sousa, Sekretáriu Estadu Komunikasaun Sosiál, Expedito Dias Ximenes, Sekretáriu Estadu Arte no Kultura, Jorge Soares Cristovão. Marka mós prezensa husi Diretór Ezekutivu ADN, Rui Lourenço da Costa, Prezidente ANATL, Romualdo Soares da Silva, Diretór-Jerál SNAEM, Simplicio Amaral de Deus, Diretór Ezekutivu Adjuntu ADN, Januario M. Guterres, Diretora Ministériu Saúde, Madalena Hanjan Soares, Sekretáriu-Jerál MNEK, João Câmara, Asesora Prinsipál Gabinete Ministru Prezidénsia Konsellu Ministrus, Ika Moniz, reprezentante ida husi F-FDTL, no tékniku sira husi Prezidénsia Konsellu Ministrus, Ministériu Saúde, Ministériu Interiór no ADN.