Ministru Petróleu no Rekursus Minerais, Francisco da Costa Monteiro, no Primeiru-Ministru Interinu, Mariano Assanami Sabino, iha loron 7 fulan-marsu tinan 2024, sai testemuña ba asinatura akordu ida entre Autoridade Nasionál Petróleu (ANP IP) no empreza HTS Exploration Ltd, husi Kazakistaun, hodi esplora minerál no gás onshore (iha rai-maran), iha Munisípiu Vikeke. 

Akordu ne’e formaliza husi Gualdino do Carmo da Silva, Prezidente ANP IP, no Aizhan Ismailova, Diretora Ezekutiva HTS Exploration LTD.

Iha tinan dahuluk, empreza HTS, serbisu hamutuk ho TIMOR GAP EP, sei hala’o análize no rejistu ba posu sira ne’ebé eziste iha kontratu. Prosesu ida-ne’e envolve avaliasaun no rejistu ba posu sira hodi garante ninia integridade, nune’e mós análize no avaliasaun dadus jeolójikus no jeofízikus. Asaun sira ne’e ho objetivu prinsipál atu hatene di’ak-liu kondisaun ne’ebé eziste iha rai-okos, hodi fó informasaun importante atu orienta etapa projetu esplorasaun minerál no gás nian iha futuru. 

Iha tinan daruak, prevee ona akizisaun sízmika 3D ka perfíl sízmiku vertikál (Veritical Seismic Profiling) metru 3325, liña dadus sízmiku kilómetru atus rua ho prosesamentu sízmiku, teste ba posu, peskiza asidifikasaun no análize kímika fluidus.

Ba tinan datoluk, kompromisu mak atu fura posu esplorasaun nian rua liuhusi dezviu laterál no posu foun ida, ka dezviu laterál rua ka posu foun rua, bainhira dezviu laterál teknikamente la viavel, ho profundidade vertikál ida loloos mínimu metru rihun rua ba posu foun sira ka medida profunda metru rihun rua ba posu dezviu laterál.

HTS Exploration Ltd asegura katak akordu ida-ne’e nu’udar kompromisu ida ho dedikasaun, kolaborasaun, respeitu malu no vizaun ida ne’ebé hamutuk ba dezenvolvimentu sustentavel, hodi kria oportunidade empregu no kapasitasaun komunidade lokál. HTS Exploration Ltd konfia iha ninia kualifikasaun, kompromisu ambientál no responsabilidade durante implementasaun projetu.

Ministru Francisco da Costa Monteiro afirma katak projetu ida-ne’e halo parte husi vizaun estratéjika Estadu nian. Governu IX komprometidu tebes atu halo esplorasaun minerál iha rai no mós iha tasi hodi kontribui ba reseita estadu. Ministériu Petróleu no Rekursus Minerais no ninia instituisaun sira kontinua serbisu makaas atu garante esplorasaun minerál no gás.

Primeiru-Ministru Interinu, Mariano Assanami Sabino, deklara katak Estadu iha obrigasaun atu utiliza rekursus naturais hanesan pilár importante ida hodi sustenta ekonomia nasionál, inklui setór turizmu no agrikultura. Governu fiar katak esplorasaun ida-ne’e sei lori mudansa no sei hadi’a populasaun nia moris.

Empreza HTS Exploration Ltd, ne’ebé selesiona liuhusi prosesu ida ne’ebé inisia iha tinan 2019, HTS nu’udár empreza espesializada ida iha esplorasaun no produsaun minerais no gás, ne’ebé iha kampu oin-oin iha Kazakistaun no fornese servisu esplorasaun no produsaun iha rejiaun ne’e.