Iha loron 6 fulan-marsu tinan 2024, Ministériu Saúde, serbisu hamutuk ho Governu Japaun no Fundu Populasaun Nasoins Unidas (UNFPA, sigla iha lian inglés), lansa inisiativa ida hodi hadi’a kuidadu saúde materna no neonatál iha Sentru Saúde Komunitáriu 20, ne’ebé distribui ona ba munisípiu 12 iha país ne’e. 

Durante serimónia ne’e Embaixadór Japaun iha Timor-Leste, Tetsuya Kimura no Reprezentante Interina UNFPA iha Timor-Leste, Domingas Bernardo, asina troka notas ida ba Projetu Melloria Instalasaun Kuidadu Obstétriku Emerjénsia Báziku no Neonatál iha Sentru Saúde Komunitáriu sira.

Projetu ne’ebé finansia hosi Japaun ho montante dolar amerikanu millaun 7,5, ho objetivu atu moderniza Sentru Saúde Komunitáriu 20, reforsa sistema kuidadu saúde primáriu atu hasa’e kualidade prestasaun kuidadu saúde materna no neonatál iha munisípiu 12. Ho inisiativa ida-ne’e hakarak atu hamenus maka’as mortalidade materna no hadi’a kualidade moris feto iha idade reprodutiva hamutuk 117.620 no inan isin-rua sira besik 20.618 tinan-tinan. 

Serimónia ne’e konta ho partisipasaun hosi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, no Vise-Ministru ba Fortalesimentu Institusionál Saúde, José dos Reis Magno.