Iha loron 1 fulan-marsu tinan 2024, Vise-Ministru ba Fortalesimentu Institusionál Saúde, José dos Reis Magno, no Diretora interina USAID iha Timor-Leste, Amy Partida, anunsia fó fundu ba Asosiasaun Médikus Timor-Leste (AMTL). Liuhosi inisiativa ida-ne’e, iha kolaborasaun metin ho Ministériu Saúde no médiku lokál sira, AMTL sei lidera dezenvolvimentu padraun dahuluk kona-ba kompeténsia no kódigu étika ba profisionál saúde sira iha Timor-Leste.  AMTL mós sei responsavel atu harii komité ida ne’ebé dedikadu ba revizaun no finalizasaun kuadru kompeténsias médikas nian. 

AMTL, hanesan asosiasaun profisionál médika, ho ninia misaun mak atu halibur médiku sira iha organizasaun profisionál ida, hametin prestasaun kuidadu saúde komunitáriu no estabelese padraun profisionál ba médiku sira.

Durante serimónia ne’e, Vise-Ministru hato’o kompromisu no apoiu totál Ministériu Saúde nian ba inisiativa ida-ne’e, no hodi apela ba médiku sira atu adota inisiativa ida-ne’e hanesan kuadru orientadór ida ba iha prátika médika loron-loron nian iha instalasaun saúde sira hodi hadi’a saúde komunitária. 

Governante ne’e destaka mós importánsia hosi estabelesimentu padraun sira kona-ba kompeténsia no kódigu étika ba médiku sira, tanba pontu importante hirak ne’e hanesan avansu krusiál iha elevasaun padraun servisus saúde iha país ne’e.

Serimónia ne’e konta ho partisipasaun hosi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, no Vise-Ministru ba Fortalesimentu Institusionál Saúde, José dos Reis Magno.