Primeiru-Ministru, Kay Rala Xanana Gusmão, no Diretora Ezekutiva Empreza Petrolífera Woodside, Meg O’Neill, realiza reuniaun ida, iha loron 6 fulan-marsu tinan 2024, iha Melbourne, Austrália, hodi diskute kestaun sira relasiona ho prosesu dezenvolvimentu ba projetu estratéjiku kampu petrolíferu Greater Sunrise nian. 

Durante enkontru ne-e, Primeiru-Ministru no Diretora Ezekutiva Woodside, deskute kona-ba estudus viabilidade relasiona ho dezenvolvimentu Greater Sunrise, nune’e mós prosesu negosiasaun ho Austrália kona-ba konseitu dezenvolvimentu rekursus nian.

Xefe Governu ne’e reafirma pozisaun Timor-Leste nian hodi estabelese baze abastesimentu no refinaria ida iha Tasi Mane, hodi liga ba kadoras Greater Sunrise, ho objetivu atu dezenvolve indústria petrolífera nasionál ida, atu garante benefísiu justu ba Timor-Leste iha esplorasaun rekursus minerais. 

Xanana Gusmão destaka katak, daudaun ne’e konklui ona luta Timor-Leste nian ba delimitasaun permanente fronteiras marítimas ho Austrália, Ministru Petróleu no Rekursus Minerais, Francisco da Costa Monteiro, no ninia ekipa oras ne’e serbisu maka’as hodi koordena ho Woodside no parte sira seluk ne’ebé envolve atu avansa iha prosesu ida-ne’e.

Meg O’Neill hato’o ninia agradesimentu ba Governu Timor-Leste ne’ebé nafatin fó konfiansa hodi serbisu hamutuk ba dezenvolvimentu Greater Sunrise. 

Woodside, empreza australiana iha setór enerjia, hanesan parte hosi konsórsiu ne’ebé dezenvolve kampus Greater Sunrise (Sunrise Joint Venture) ho partisipasaun 33,44%, hamutuk ho TIMOR GAP ne’ebé iha 56,6%, no Osaka Gas Australia ho partisipasaun 10%.

Kampu gás naturál no kondensadu Sunrise no Troubadour, ne’ebé hamutuk hanaran kampus Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha norueste Darwin, iha Territóriu Norte Austrália nian.

Iha reuniaun ne’e, Primeiru-Ministru akompaña hosi Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministra ba Asuntus ASEAN, Milena Rangel, Ministru Negósius Estranjeirus no Kooperasaun, Bendito dos Santos Freitas no Embaixadora Timor-Leste iha Austrália, Inês de Almeida, no ekipa téknika.