Primeiru-Ministru, Kay Rala Xanana Gusmão, akompaña husi Sekretáriu Estadu Arte no Kultura, Jorge Soares Cristóvão, hala’o sorumutuk ida ho Maria Madeira, artista timoroan dahuluk atu reprezenta país iha Bienál Internasionál Veneza, ne’ebé sei hala’o husi loron 20 fulan-abríl to’o loron 24 fulan-novembru tinan 2024. Edisaun ba tinan ida-ne’e, ba da-60, ho tema “estranjeirus iha fatin hotu-hotu”. Sorumutuk ne’e hala’o iha loron 4 fulan-marsu tinan 2024, iha Melbourne, Austrália, iha ne’ebé delegasaun timoroan ida, lidera husi Primeiru-Ministru, partisipa iha Simeira komemorativa ba da-50 aniversáriu parseria diálogu Austrália ho ASEAN. 

Durante sorumutuk ho artista no ninia ekipa, halo aprezentasaun ida ba Xefe Governu kona-ba obra “Kiss and Don’t Tell” (“Rei no Labele Konta), ne’ebé sei hatudu-sai iha espozisaun internasionál arte kontemporánea nian ne’ebé iha prestíjiu boot, hala’o kada tinan rua iha sidade italiana Veneza. Partisipasaun Timor-Leste konta ho kuradoria Natalie King no ho partisipasaun husi artista Alfeu no artista sira seluk husi grupu Arte Moris. 

Obra “Kiss and Don’t Tell” fó-omenajen ba forsa no reziliénsia feto Timor-Leste durante okupasaun indonézia. Ho kuadradu besik metru 25, matéria prinsipál iha espozisaun ne’e halo husi matériais tradisionais, hanesan, bua-fuan, rai no pigmentus (kór-rahun, buat ne’ebé fó kór). Aleinde husi obra ida-ne’e, sei aprezenta forma espresaun artístika sira seluk, hanesan instalasaun, vídeo no performance sira. 

Artista ne’e espresa ninia orgullu boot hodi hatudu preparasaun ne’ebé la’o hela kona-ba espozisaun ida-ne’e ba Primeiru-Ministru no membru Governu sira seluk ne’ebé marka prezensa, no ko’alia liuliu kona-ba apoiu Sekretáriu Estadu Arte no Kultura nian durante prosesu preparasaun kona-ba partisipasaun istórika ida-ne’e iha Bienál Veneza. 

Sorumutuk ne’e konta mós ho partisipasaun hosi Vise-Primeiru Ministru, Ministru Koordenadór Asuntus Ekonómikus no Ministrus Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Vice-Ministra ba Asuntus ASEAN, Milena Maria da Costa Rangel no Embaixadora Timor-Leste iha Austrália, Inês Almeida.