Ministra Estadu Reinu Unidu ba Indo-Pasífiku, Anne Marie-Trevelyan, hafoin sorumutuk ida ho Primeiru-Ministru, Kay Rala Xanana Gusmão, iha Palásiu Governu, Dili, anunsia desizaun atu loke filafali embaixada Reinu Unidu iha Timor-Leste no hametin lasus entre nasaun rua ne’e. Sorumutuk ne’e mós konta ho partisipasaun husi Vise-Ministra ba Asuntus ASEAN, Milena Maria da Costa Rangel no Embaixadór Timor-Leste iha Reinu Unidu, João Paulo da Costa Rangel. 

Durante sorumutuk ne’e, Xefe Governu no Ministra Reinu Unidu diskute estratéjias atu reforsa parseria bilaterál, liuliu iha preparasaun Timor-Leste nian ba adezaun Asosiasaun Nasoins Sudeste Aziátiku (ASEAN), no mós dezenvolvimentu ekonómiku, saúde no nutrisaun.

Anne Marie-Trevelyan hato’o ninia satisfasaun ho fó-sai “intensaun Governu Reinu Unidu nian atu loke filafali ami-nia embaixada iha Dili”, no destaka katak “ne’e hatudu kompromisu husi Reinu Unidu ba povu timoroan”. 

Ministra ne’e mós esplika katak “reabertura prezensa permanente Reinu Unidu nian ida iha Dili sei marka etapa tuirmai iha ita-nia relasaun bilaterál ne’ebé metin liután, tuir intensifikasaun husi ita-nia envolvimentu durante tinan rua ikus ne’e, inklui vizita Prezidente Ramos-Horta ba Reinu Unidu foin daudaun ne’e, iha fulan-janeiru”. 

“Reinu Unidu kompromete ona atu harii parseria tempu naruk ne’ebé forte liután iha Indo-Pasífiku atu apoia seguransa marítima no ekonómika, no utiliza ita-nia rede diplomátika globál atu apoia relasaun sira-ne’e”, afirma Ministra Estadu Reinu Unidu ba Indo-Pasífiku.

Ida-ne’e hanesan vizita daruak husi Anne Marie-Trevelyan mai Timor-Leste, hafoin ninia vizita iha fulan-outubru tinan 2023.