Iha ámbitu Simeira komemorativa ba da-50 aniversáriu parseria diálogu Austrália ho ASEAN nian, ne’ebé hala’o daudaun iha Sentru Konvesoins no Espozisoins Melbourne, Austrália, Ministru Negósius Estranjeirus no Kooperasaun Timor-Leste, Bendito dos Santos Freitas, hala’o sorumutuk bilaterál ida ho Ministra Negósius Estranjeirus Austrália, Senadora Penny Wong, iha loron 4 fulan-marsu tinan 2024. Sorumutuk ne’e mós partisipa husi Vise-Ministra ba Asuntus ASEAN, Milena Rangel, no ninia delegasaun sira. 

Durante sorumutuk ne’e, ko’alia kona-ba temátika interese mútuu oin-oin, no haree liu asinatura protokolu adezaun Timor-Leste nian ba Organizasaun Mundiál Komérsiu (OMK) foin daudaun ne’e.

Ministra Negósius Estranjeirus Austrália, hato’o ninia parabéns ba Governu Timor-Leste ninia adezaun ba OMK no rekoñese importánsia husi pasu signifikativu ida-ne’e. Diskute mós kestaun kona-ba hametin kooperasaun bilaterál kontínuu entre Timor-Leste no Austrália, no mós Austrália nia apoiu firme ba prosesu adezaun Timor-Leste ba ASEAN. 

Delegasaun Timor-Leste iha Simeira ASEAN-Austrália ne’e lidera husi Primeiru-Ministru, Kay Rala Xanana Gusmão, ne’ebé prevee ona atu halo, durante eventu ida-ne’e, sorumutuk ho líderes husi país sira seluk rejiaun ne’e nian, liuliu ho Primeiru-Ministru australianu, Anthony Albanese. Sorumutuk sira-ne’e ho objetivu atu esplora no promove perspetiva kooperasaun bilaterál no asuntu sira seluk kona-ba interese komún.