Sekretáriu Estadu Peskas, Domingos da Conceição dos Santos, partisipa iha sesaun Konferénsia Rejionál Ázia-Pasífiku FAO ba da-37 (APRC, sigla lian inglés), Organizasaun Nasoins Unidas ba Hahán no Agrikultura (FAO, akrónimu iha lian inglés), ne’ebé realiza iha loron 19 no loron 22 fulan-fevereiru, iha Kolombu, Sri Lanka. 
APRC hanesan reuniaun rejionál ida ne’ebé organiza husi FAO, dedikada ba Ázia no Pasífiku, ho objetivu atu diskute no aborda kestaun sira hanesan seguransa ai-han, agrikultura sustentavel no dezenvolvimentu rurál. Durante konferénsia, reprezentantes husi nasaun membrus rejiaun nian, espesialista, organizasaun naun-governamentál no partisipante relevante sira seluk halibur malu hodi diskute no debate polítika, estratéjia, no inisiativa sira ho objetivu atu hadi’a produsaun agrikultura, promove seguransa ai-han no kombate hamlaha. Konferénsia ne’e funsiona hanesan forum ida atu troka esperiénsia no prátika ne’ebé di’ak entre nasaun sira iha rejiaun ne’e, promove kooperasaun no kolaborasaun rejionál. 
Iha intervensaun Sekretáriu Estadu reafirma “kompromisu [Governu Timor-Leste nian] hodi kontribui ba asaun globál sira husi Objetivu Dezenvolvimentu Sustentavel 17 (ODS), liuliu relasiona ho ODS-2 (Laiha Hamlaha), ODS-13 (Asaun Klimátika), ODS-14 (Moris iha Bee-Laran) no ODS-15 ( Moris iha Terrestre)”.
Domingos da Conceição dos Santos esplika katak “impaktu husi mudansas klimátikas mak afeta agrikultór ki’ik sira, hakiak animál no peskadór sira (inklui menus/falta bee) no hanesan dezafiu boot ida ba setór agríkola no ai-han Timor-Leste nian”.
Nia mós hateten ninia vontade hodi alkansa “partisipasaun no kolaborasaun ida ne’ebé metin liu iha Kooperasaun Súl-Súl no Triangulár”.
“Lori delegasaun Timor-Leste nia naran”, Sekretáriu Estadu elojia ba “esforsus FAO nian hodi konsidera ho sériu estabelese reprezentasaun plena ida iha Timor-Leste hanesan pasu fundamental ida atu hametin parseria entre FAO no Timor-Leste”.