Konsellu Ministrus, iha sorumutuk loron 28 fulan-fevereiru tinan 2024, delibera ona atu autoriza despeza to’o montante dolar amerikanu millaun 12 hosi Fundu Kontinjénsia ba Komisaun Koordenadora Altu Nivel Institusionál ba vizita Sua Santidade Papa Francisco hodi organiza atividades preparasaun ba vizita refere.

Komisaun ida-ne’e, lidera husi Ministru Prezidénsia Konsellu Ministrus, Agio Pereira, no Ministru Administrasaun Estatál, Tomás do Rosário Cabral, nu’udar Vise-Koordenadór Jerál Altu Nivel Institusionál, ne’ebé responsavel hodi organiza atividades preparatória ba vizita papál. 

Atribuisoins Koordenadór-Jerál no Vise-Koordenadór Jerál Altu Nivel Institusionál nian inklui reprezenta Governu timorense iha prezensa reprezentante Santa Sé ne’ebé responsavel ba preparasaun vizita ne’e, akompaña delegasaun Vatikanu no propoin nomeasaun Komisaun Ezekutiva ida ba preparasaun vizita refere. Sira mós responsavel atu halo koordenasaun ho departamentu governamentál relevante no entidade sira seluk hodi garante asaun nesesária hotu ba realizasaun vizita ne’e.

Iha loron 12 fulan-fevereiru liubá, Reprezentante Santa Sé iha Timor-Leste, Monseñór Marco Sprizzi hateten katak, maske “seidauk bele konfirma data”, “Governu Timor halo hela preparasaun ida ne’ebé di’ak-tebes” no “lori Santa Sé nia naran” agradese “ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”. 

Monseñór Marco Sprizzi hateten tan katak, “delegasaun Vatikanu [ne’ebé iha fulan-janeiru mai Timor-Leste] sente admiradu tebes ho serbisu ne’ebé Governu Timor-Leste halo hela iha preparasaun ida-ne’e”.

Iha sorumutuk hanesan, Konsellu Ministrus autoriza ona despeza ho dolar amerikanu millaun 15 ba konsesaun subvensaun anuál ida ba Konferénsia Episkopál Timorense (CET, sigla iha lian portugés), ne’ebé sei ezekuta durante tinan 2024. Subvensaun anuál ida-ne’e, estabelese tuir akordu iha loron 14 fulan-agostu tinan 2015 entre Timor-Leste no Santa Sé, no tuir Akordu-Kuadru ne’ebé asina iha loron 16 fulan-juñu tinan 2017 entre Governu no CET, ho objetivu atu apoia atividade sosiál, edukativa no governu ekleziál Igreja Katólika nian.

Pontu situasaun kona-ba implementasaun kontratu públiku iha ámbitu projetu jestaun rezíduu sólidu urbanu Dili nian mós halo ona análize.