Sorumutuk Konsellu Ministrus nian iha loron 28 fulan-fevereiru tinan 2024
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 28 fulan-fevereiru tinan 2024
Konsellu Ministrus hala’o sorumutuk iha Palásiu Governu, Dili, no analiza ona aprezentasaun husi Ministru Administrasaun Estatál, Tomás do Rosário Cabral, kona-ba pontu situasaun husi implementasaun kontratu públiku iha ámbitu projetu jestaun rezíduu sólidu urbanu iha Dili.
****
Konsellu Ministrus delibera atu autoriza despeza to’o montante dolar amerikanu millaun 12 husi Fundu Kontinjénsia ba Komisaun Altu Nivel Institusionál ba vizita Sua Santidade Papa Francisco, hodi organiza atividade preparasaun ba vizita refere.
****
Tuir projetu ne’ebé aprezenta husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, Konsellu Ministrus delibera ona hodi autoriza despeza ho valór dolar amerikanu millaun 15 kona-ba atribuisaun subvensaun anuál ida ba Konferénsia Episkopál Timorense (CET, sigla iha lian portugés), ne’ebé sei ezekuta durante tinan 2024.
Subvensaun anuál ba Konferénsia episkopál Timorense ida- ne’e, hala’o tuir akordu ne’ebé asina ona iha loron 14 fulan-agostu tinan 2015 entre Timor-Leste ho Santa Sé, nune’e mós Akordu-Kuadru ne’ebé asina ona iha loron 16 fulan-juñu tinan 2017 entre Governu ho CET, ne-ebé prevee kontribuisaun anuál ida, tuir disponibilidade finanseira husi Governu, ba atividades ho karater sosiál, edukativu no governu ekleziál Igreja Katólika nian. REMATA
