Ministra Solidariedade Sosiál no Inkluzaun, Verónica das Dores, reprezenta Primeiru-Ministru, Kay Rala Xanana Gusmão, lansa ofisiálmente Portál Seguransa Sosiál Timor-Leste nian, iha serimónia ida ne’ebé hala’o iha loron 22 fulan-fevereiru tinan 2024, iha Timor Plaza, Dili. Portál Seguransa Sosiál ne’e disponivel iha https://segurancasocial.gov.tl/. 

Seguransa Sosiál nu’udar medida lubun ida ne’ebé ho objetivu atu proteje traballadór sira ho sira-nia família iha situasaun ne’ebé lakon rendimentu hosi serbisu ka iha situasaun ne’ebé ho rendimentu la sufisiente, iha situasaun balun (seguransa sosiál kontributiva), hodi prevene moris-ki’ak no mantein kapasidade konsumu nomós dinamizasaun atividade empreza sira nian. Seguransa Sosiál ne’e mós ho objetivu atu garante moris dignu ba sidadaun sira hotu liuhosi asesu ba nesesidade moris mínimu ne’ebé vitál (seguransa sosiál sidadania nian), no ajuda kombate moris-ki’ak.

Iha Timor-Leste, Sistema Seguransa Sosiál hanesan komponente fundamentál ida hosi Protesaun Sosiál, no integra rejime kontributivu (previdensiál) no rejime la kontributivu (sidadania). 

Lansamentu portál ida-ne’e hetan apoiu hosi Ministériu Traballu, Solidariedade no Seguransa Sosiál Portugál, liuhosi projetu Action Portugal no Organizasaun Internasionál Traballu (ILO).

Ministra Verónica das Dores agradese ba parseiru sira ba kooperasaun téknika ne’ebé permite lansamentu Portál ida-ne’e no salienta importánsia hosi ferramenta ida-ne’e hodi aumenta asesu traballadór no entidade empregadora sira nian ba sistema seguransa sosiál. 

Serimónia lansamentu Portál Seguransa Sosiál ne’e konta ho partisipasaun hosi membrus Governu, membrus Parlamentu Nasionál, korpu diplomátiku, reprezentantes Komandu PNTL, reprezentante Banku Nasionál Komérsiu Timor-Leste nian, lider relijiozu no konvidadu sira seluk.