Sekretáriu Estadu Komunikasaun Sosiál, Expedito Loro Dias Ximenes, hala’o vizita serbisu ida ba Kamberra, Austrália, iha loron 14 no 15 fulan-fevereiru, hodi partisipa iha diskusaun ne’ebé promove husi National Press Club of Australia (Club Nasionál Imprensa Austrália nian) kona-ba alterasaun klimátika, nune’e mós hala’o sorumutuk ho entidade oi-oin ho objetivu atu dezenvolve parseria iha setor komunikasaun sosiál. 

Eventu ne’ebé ko’alia-liu kona-ba alterasaun klimátika ne’e, konta mós ho partisipasaun hosi jornalista no espesialista senior sira seluk komunikasaun sosiál nian, ne’ebé foka ba impaktu ekonómiku signifikativu ne’ebé kauza husi alterasaun klimátika.

National Press Club of Austrália, ne’ebé harii iha tinan 1963, ho objetivu  atu serbí hanesan forum hodi troka ideia no informasaun entre profisionál sira iha komunikasaun sosiál, polítiku, emprezáriu no lider importante sira seluk. 

Sekretáriu Estadu mós hala’o  vizita ida ba DAM Smart, empreza espesializada ida kona-ba servisu dijitalizasaun audiovizuál, hodi diskute posibilidade kolaborasaun iha prosesu dijitalizasaun empreza públika rádiu no televizaun nasionál, RTTL EP nian.

Hala’o enkontru ho responsavel reguladór sira komunikasaun sosiál Australia nian, Australian Communications and Media Authority (ACMA), no emisora prinsipál radiodifuzaun públika Austrália nian, ABC (Australian Broadcasting Corporation), ho objetivu atu diskute posibilidade kooperasaun ba formasaun jornalista, liu-liu iha jornalizmu investigasaun nian. 

Expedito Ximenes vizita mós Edifísiu Parlamentu Austrália, Ministériu Negósius Estranjeirus no Komérsiu país ida-ne’e nian, no Muzeu Demokrasia Austrália. 

Iha viajen ofisial ba Austrália ne’e, Sekretáriu Estadu hetan akompañamentu husi Prezidente RTTL EP, José António Belo “Taraleu”, no Vice-Diretór Ezekutivu Teknolojia, Informátika no Komunikasaun Institutu Públiku TIC-Timor IP nian, Eligio Moniz do Rego.