Ministra Solidariedade Sosiál no Inkluzaun, Verónica das Dores, akompaña husi Vise-Ministra Céu Brites, fó pose ba Arlindo Pinto ba mandatu tinan tolu hanesan Prezidente Konsellu Administrasaun Institutu Nasionál Seguransa Sosiál (INSS), no hanesan mós Presidente Konsellu Fundu Rezerva Seguransa Sosiál. Serimónia simu pose ne’e realiza iha Ministériu Solidariedade Sosiál no Inkluzaun, iha Dili, loron 16 fulan-fevereiru.

Nomeasaun ba Arlindo Pinto hetan aprovasaun liuhusi Rezolusaun Governu nian ida, ne’ebé fó énfaze ba ninia “kompeténsia ne’ebé hetan rekoñesimentu” no destaka ninia karreira profisionál “ne’ebé halo nia iha koñesimentu, formasaun téknika no esperiénsia kualifikada sira ne’ebé hatudu kapasidade diresaun no hatudu ninia adekuasaun perfíl hodi dezempeña kargu ida-ne’e”.

Dulce Natividade da Cunha no Solange de Fátima Borges, tuir proposta membru Governu ne’ebé responsavel ba solidariedade sosiál, Sansão Gomes, ne’ebé reprezenta empregadór sira no Almério Vila Nova Gouveia, reprezenta traballadór sira, simu mós pose hanesan vogál sira Konsellu Administrasaun INSS nian, ba periodu tinan tolu.

Durante ninia intervensaun iha serimónia ne’e, Ministra Verónica das Dores destaka misaun estrutura foun nian, ne’ebé tenke orienta ba otimizasaun sistema jestaun no administrasaun atendimentu seguransa sosiál nian, no mós melloramentu ba sistema implementasaun no jestaun investimentu ba Fundu Rezerva Seguransa Sosiál.

Primeiru-Ministru, Kay Rala Xanana Gusmão, apela ba estrutura foun INSS nian atu serbisu ho responsabilidade no onestidade iha jestaun rekursus finanseirus povo nian.

Serimónia ne’e konta mós ho prezensa husi membrus Governu Konstitusionál da-9 nian seluk, reprezentante husi Parlamentu Nasionál, Prezidénsia Repúblika, Korpu Diplomátiku, parseiru dezenvolvimentu no konfisaun relijioza sira.