Hafoin Sorumutuk Ministeriál entre Uniaun Europeia no Ministrus Estadus indo-pasífiku no entre Ministru Uniaun Europeia no Ministru Negósius Estranjeirus ASEAN no Timor-Leste nian remata, Ministru Negósius Estranjeirus no Kooperasaun, Bendito dos Santos Freitas, iha loron 3 fulan-fevereiru tinan 2024 hasoru-malu fali ho ninia omólogu husi Repúblika Portugeza, João Cravinho no ninia delegasaun, hodi ko’alia kona-ba kestaun oioin ne’ebé iha relasaun ho kooperasaun bilateral. 

Sorumutuk ne’e hala’o iha Ótel Sofitel, Bruxelas, iha enkontru ne’e sira ko’alia liu kona-ba kooperasaun iha área justisa, edukasaun no formasaun profisionál, saúde, administrasaun Estatál, servisu notariadu no apoiu mútua ba dezenvolvimentu no konsolidasaun lian portugéz.

Ministru João Cravinho mós hato’o sentimentu triste ne’ebé kle’an Governu Portugeza nian ba Ministru Justisa Timor-Leste, Amândio de Sá Benevides ninia mate.