Prezidente Repúblika, José Ramos-Horta, ohin loron 15, fulan-fevereiru 2024, fó posse ba Sérgio de Jesus Fernandes da Costa Hornai hanesan Ministru Justisa IX Governu Konstitusionál, iha serimónia ida ne’ebé hala’o iha Palásiu Prezidensiál Nicolau Lobato, iha Díli.

Sérgio Hornai troka Amândio de Sá Benevides, ne’ebé mate iha loron 20 fulan Janeiru liu ba.

Ministru foun ne’e okupa ona kargu públiku oin-oin, maka hanesan Defensór Públiku-Jerál entre 2009 no 2018, Konselleiru Estadu no Komisáriu Komisaun Anti-Korrupsaun (KAK), entre tinan 2019 no 2023.

Primeiru-Ministru, Kay Rala Xanana Gusmão, justifika ninia desizaun atu hili Sérgio Hornai bazeia ba ninia “esperiénsia barak iha setór Justisa”, konsidera nia hanesan ema ne’ebé maka so’i duni atu lidera “ reforma husi setór ida ne’ebé maka sei frájil hela”.

Sérgio Hornai jura “atu kumpri ho loloos ba funsaun sira ne’ebé fó ona fiar ba [nia], atu kumpri no halo kumpri ba konstituisaun no ba lei sira, no fó [ninia] enerjia no ninia kapasidade sira iha defeza ba konsolidasaun independénsia no ba unidade nasionál”. 

Prezidente Repúblika, José Ramos-Horta, hahú nia diskursu iha serimónia ho omenajen ida, “ho laran susar tebtebes tanba Ministru [Justisa Amândio de Sá] Benevides ne’ebé mate, maka kontribui ona ba nasaun, husi ninia servisu ne’ebé maka ho valór boot tebtebes, durante ninia moris, liuliu hanesan Ministru Justisa.

Xefe Estadu hato’o ninia gratidaun hodi fó pose ba Sérgio Hornai “haree ba ninia karreira brillante iha setór justisa, ne’ebé maka nia hala’o beibeik ona hanesan Defensór Públiku no hanesan Prezidente KAK”.

José Ramos-Horta afirma katak Sérgio Hornai “presiza kria kondisoens hodi apoia setór justisa iha buat hotu-hotu ne’ebé maka nesesita atu halo”, “atu servidór justisa sira hotu, bele hala’o sira-nia funsaun ho previzíbilidade, trankuilidade, segurunsa no konfortu”.

Na’i Ulun ne’e, apela mós ba Ministru Justisa foun katak “ida husi prioridade boot sira” iha ninia mandatu maka “atu reforsa, fó apoiu tomak, dignifika Defensoria Públika”, hodi fó “apoiu maka’as liu, fó atensaun boot liu”, tanba Defensoria Públika “iha Timor-Leste, tamba kondisaun sosiál no ekonómika sira país nian’, “okupa pozisaun ida ne’ebé mak importante liu”.