Ohin, hafoin sorumutuk ida ne’ebé hala’o, iha loron 12 fulan-fevereiru tinan 2024, ho Prezidente Repúblika, José Ramos-Horta, Reprezentante Santa Sé iha Timor-Leste, Monseñór Marco Sprizzi, anunsia ona preparasaun ne’ebé la’o hela “ba posibilidade vizita Santu Padre Papa Francisco mai Timor-Leste”.

Monseñór Marco Sprizzi, afirma ona mós katak “seidauk bele konfirma data”, kona-ba informasaun ida-ne’e “sei anunsia husi Vatikanu hamutuk ho Governu”. 

Reprezentante husi Santa Sé ne’e afirma tan katak, “Governu Timor halo hela preparasaun ida ne’ebé di’ak-tebes” no hateten tan katak “delegasaun Vatikanu [ne’ebé mai Timor-Leste iha fulan-kotuk, durante loron tolu] sente admiradu tebes ho serbisu ne’ebé Governu Timor-Leste halo hela iha preparasaun ida-ne’e”.

Marco Sprizzi hato’o agradesimentu “lori Santa Sé nia naran ba Governu, Prezidente Repúblika, Primeiru-Ministru no Ministrus ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”. 

Primeiru-Ministru, Kay Rala Xanana Gusmão, liuhusi Despaxu n. 012/GPM /I/2024, loron 11 fulan-janeiru tinan 2024, nomeia Ministru Prezidénsia Konsellu Ministrus, Agio Pereira, hanesan Koordenadór Jerál Altu Nivel Institusionál ba vizita Sua Santidade Papa Francisco nian. Ministru Administrasaun Estatál, Tomás do Rosário Cabral, ho despaxu refere, hetan mós nomeasaun hanesan Vise-Koordenadór Jerál Altu Nivel Institusionál ba vizita ida-ne’e.

Responsabilidade Koordenadór-Jerál no Vise-Koordenadór Jerál Altu Nivel Institusionál nian inklui reprezentasaun husi Governu Timor-Leste hamutuk ho reprezentante sira husi Santa Sé maka responsavel ba preparasaun vizita Sua Santidade, Papa Francisco nian mai Timor-Leste, halo akompañamentu ba delegasaun Vatikanu no proposta atu halo nomeasaun ba Komisaun Ezekutiva ida hodi halo preparasaun ba vizita ne’e. Sira mós simu mandatu hodi serbisu hamutuk ho departamentu governamentál kompetente sira no entidade sira seluk atu adopta asaun nesesária sira hotu ba realizasaun vizita ne’e. 

Komisaun organizadora ne’ebé lidera husi Ministru Agio Pereira, halo ona esforsu tomak ba preparasaun ida-ne’e, kona-ba lojístiku, infraestrutura, seguransa, saúde, protokolu no komunikasaun, ho objetivu atu asegura susesu vizita Sua Santidade, Papa Francisco nian mai Timor-Leste.