Sekretáriu Estadu Komunikasaun Sosiál (SEKOMS), Expedito Dias Ximenes, sei hala’o lansamentu ba Planu Estratéjiku tinan 2024-2028 SEKOMS nian, aban loron 08 fulan-janeiru tinan 2024, iha serimónia ida-ne’ebé dirije ba parseiru órgaun komunikasaun sosiál sira hotu.

Planu Estratéjiku ida-ne’e, nu’udár matadalan institusionál, ho objetivu atu orienta atividade sira Sekretaria Estadu nian durante ninia mandatu governamentál, husi tinan 2024 to’o tinan 2028, hodi deskreve diretrís funsionál no operasionál  sira ne’ebé nesesária  ba implementasaun ida-ne’ebé efisiente husi planu estratéjiku ida-ne’e.

Planu estratéjiku ne’e hanesan mós dokumentu esensiál ida atu fasilita kolaborasaun instituisaun ida-ne’e ho ninia parseiru sira, hodibele kontribui ho forma direta no indireta ba prosesu implementasaun no garante liberdade espresaun no asesu informasaun ba populasaun tomak iha Timor-Leste.

Durante lansamentu ne’e, SEKOMS mós sei hala’o akordu parseria ho órgaun sira komunikasaun imprensa hakerek no online nian iha komunikasaun sosiál.