Sekretáriu Estadu Formasaun Profisionál no Empregu (SEFOPE), Rogério Araújo Mendonça no reprezentante rezidente Programa Nasoins Unidas ba Dezenvolvimentu (PNUD) nian iha Timor-Leste, Katyna Argueta, iha loron 6 fulan-fevereiru tinan 2024, iha edifísiu sekretaria Estadu ida-ne’e nian, asina ona Memorandu Entendimentu ida, ho objetivu prinsipál atu fasilita asesu ba merkadu traballu, formasaun ba empreendedorizmu no solusaun sustentavel ba subsisténsia iha Timor-Leste. 

Ho memorandu entendimentu ida-ne’e no liuhusi projetu Kompeténsia ba Empregu no Empreendedorizmu Joven (YEES, sigla iha lian inglés) no Infraestrutura Komunitária ba Reziliénsia (CIReP, sigla iha lian inglés), SEFOPE no PNUD sei kolabora iha programa promosaun asesu ba merkadu traballu, formasaun ba kompeténsia pesoál, orientasaun karreira, feira empregu, formasaun empreendedorizmu, formasaun profisionál, programa serbisu remuneradu no formasaun iha fatin serbisu ba funsionáriu sira SEFOPE nian.

Sekretáriu Estadu iha ninia intervensaun durante serimónia ne’e, espresa entuziazmu boot ba futuru perspetiva hosi kolaborasaun ida-ne’e, no hato’o esperansa katak “tuir memorandu entendimentu ida-ne’e, SEFOPE no PNUD bele fó apoiu iha identifikasaun modelu no kuadru dezenvolvimentu ne’ebé funsiona no alkansa rezultadu, no hodi partilla esperiénsia barak tuir posibilidade ne’ebé iha hodi fó benefísiu ba ita-nia populasaun tomak. 

Reprezentante Rezidente PNUD ne’e manifesta ninia gratidaun ba Diretór-Jerál no ekipa téknika SEFOPE nian, nune’e mós ba ekipa PNUD, ba esforsu efisiente no komprometidu iha fortalesimentu kooperasaun entre instituisaun rua ne’e. Nia hatutan tan katak, asinatura ba akordu ida-ne’e hanesan inísiu de’it ba esforsu ne’ebé kontínuu, no hein katak bele hetan impaktu pozitivu ba parseria ida-ne’e iha futuru.

Aleinde Sekretáriu Estadu SEFOPE no Reprezentante Rezidente PNUD nian, serimónia ne’e konta ho prezensa husi Diretór-Jerál no Diretór Nasionál sira SEFOPE, no kolaboradór sira PNUD nian.