Primeiru-Ministru, Kay Rala Xanana Gusmão, hala’o ninia vizita ofisiál dahuluk ba Indonézia husikedas nia simu pose iha fulan-jullu liubá, hodi hala’o sorumutuk ho Prezidente Repúblika Indonézia, Joko Widodo, iha Jakarta, iha loron 26 fulan-janeiru tinan 2024. 

Delegasaun timoroan ne’ebé lidera husi Xefe Governu, inklui Ministru Negósius Estranjeirus no Kooperasaun, Bendito dos Santos Freitas, Ministru Transportes no Komunikasoins, Miguel Marques Gonçalves Manetelu, Ministru Planeamentu no Investimentu Estratéjiku, Gastão Francisco de Sousa, Sekretáriu Estadu Komunikasaun Sosiál, Expedito Dias Ximenes, no delegasaun husi Gabinete Fronteiras Marítimas no Terrestres. 

Durante sorumutuk, parte rua ne’e konkorda malu atu dudu ba oin rezolusaun kona-ba prosesu negosiasaun fronteiras terrestres entre país rua ne’e, hafoin hetan ona akordu katak, molok halo asinatura formal presiza avansa ho rezolusaun ba kestaun téknika sira ne’ebé pendente no presiza konsensu, ho objetivu atu fó benefísiu mútuu, liuliu ba populasaun iha área fronteirisa sira. 

Lider sira mós ko’alia liu kona-ba kompromisu atu intensifika kooperasaun ekonómika, ho estabelesimentu parseria estratéjika ba promosaun dezenvolvimentu sustentável iha nasaun rua ne’e. 

Iha setór infraestrutura nian, Ministru Planeamentu no Investimentu Estratéjiku, Gastão Francisco de Sousa, asina memorandu entendimentu ida, ho objetivu ba kapasitasaun rekursus umanus iha área enjeñaria. 

Ministru Transportes no Komunikasoins, Miguel Marques Gonçalves Manetelu, formaliza ona akordu kooperasaun ida iha área komunikasaun no informátika atu hadi’a infraestrutura telekomunikasaun iha país rua ne’e. 

Iha ámbitu rejionál, Prezidente indonézia hato’o kompromisu atu kontinua apoia adezaun plena Timor-Leste nian ba ASEAN no diskute mós kona-ba kestaun Myanmar nian, lider sira husi parte rua ne’e konkorda atu fó apoiu ba Prezidénsia Laos iha ASEAN, iha tinan ida-ne’e, hodi promove implementasaun Konsensu Pontu Lima nian.

Primeiru-Ministru Xanana Gusmão destaka importánsia ba sorumutuk ida-ne’e “hodi reafirma relasaun amizade, solidariedade no kooperasaun ne’ebé eziste entre país rua ne’e”.

Prezidente Joko Widodo afirma katak, “nu’udar onra ida ba Indonézia hodi simu vizita ofisiál dahuluk husi Primeiru-Ministru Xanana Gusmão husikedas nia simu pose iha fulan-jullu liubá, ne’ebé hatudu fortalesimentu lasu entre Timor-Leste no Indonézia.”