Delegasaun husi Sekretariadu Organizasaun Mundial Komérsiu (OMK), lidera husi Maika Oshikawa, Diretora Divizaun Adezaun OMK nian, hamutuk ho Anna Varyanik, Ofisial Asuntu Jurídiku husi Divizaun Adezaun nian, oras nee halao hela vizita ofisial mai Timor-Leste hahu’u husi loron 22 até 25  janeiru 2024.

Objetivu prinsipal husi vizita nee hodi halo diskusaun intensivas ho interveniente importante sira iha Timor-Leste relativamente konaba prosesu adezaun Timor-Leste nian ba OMK. Formalmente, Timor-Leste nia adezaun ba OMK sei akontese durante Konferênsia Ministerial (MC13) iha Abu Dhabi, loron 26-29 Fevereiru 2024.

Durante vizita nee, delegasaun mos sei konsentra ba aspeitu krusiais konaba prosesu pos- adezaun nian, inklui oinsa reforsa kuadru polítiku, reforsa estrutura no liña kordenasaun institusional, estabelesimentu kuadru lejislativu ho nia implementasaun, garante transparênsia no asistênsia téknika inklui reforsa kapasidade. Estratéjia hodi enfatiza sensibilizasaun públiku através husi envolvimentu várius segmentu sosiedade hodi bele iha partisipasaun  ativa haktuir husi kuadru OMK nian.

Liuhusi tulun Gabinete Vice-Primeiru Ministru, Ministru Koordenador Asuntu Ekonómiku, Ministru Turizmu no Ambiente, delegasaun sei realiza reuniaun importante ho pesoal importante sira hanesan ho Ministrus Transporte no Komunikasoen, Ministru Komérsiu no Indústria,Ministru Agrikultura, Pekuária, Peska no Floresta, Ministra Finansas, Vice-Ministra Asuntu ASEAN inklui membru Parlamentu Nasional sira. 

Importânsia adezaun Timor-Leste ba OMK subliña mos iha vizita delegasaun, tamba vizita nee reprezenta pasu krusial konaba integrasaun país nee iha sistema komersial global. Iha sorin seluk, delegasaun sei involve mos iha reuniaun ho Parseiru Dezenvolvimentu sira hodi koalia konaba Implementasaun depois pós-adezaun Timor-Leste nian ba OMK. Diskusaun nee sei abranje ba área neebe presiza apoiu husi parseiru sira durante períodu pós-adezaun depois Timor-Leste integra sai membru OMK.

Adezaun Timor-Leste ba OMK sei mellora dezenvolvimentu ekonómika, promove asesu ba merkadu neebe mais boot, promove prátika komersiais neebe justas hodi insentiva investimentu rai liur. Aseitasaun ofisial Timor-Leste ba OMK iha Konferênsia Ministerial neebe sei halao iha Abu Dhabi simboliza rekoñesimentu komunidade internasional ba kompromisu país nian konaba norma komersiais global.