Konsellu Ministrus, iha sorumutuk, loron 24 fulan-janeiru tinan 2024, aprova ona Rezolusaun Governu nian rua, ne’ebé  ho objetivu atu hadi’a dezenvolvimentu ekonómiku no reforsa autonomia Rejiaun Administrativa Espesiál Oe-kusi Ambenu (RAEOA) nian.

Rezolusaun dahuluk Governu nian ne’e, ko’alia liu kona-ba nesesidade reestruturasaun no autonomia RAEOA  hanesan propoin  ona iha Programa Governu. Ho objetivu atu hadia filafali konfiansa populasaun nian, dinamiza dezenvolvimentu ekonómiku no estabelese relasaun ne’ebé metin ho interveniente sira hotu, inklui populasaun, parseiru no parte interesada sira seluk.

Tanba ne’e, Governu nomeia señór Rogério Tiago Lobato hanesan Prezidente Autoridade RAEOA, ba mandatu ida tinan lima nian, ho misaun prinsipál atu superviziona atividades desentralizasaun nian, eduka no mobiliza populasaun lokál ba envolvimentu konxiente ida iha dezenvolvimentu ekonómiku Enklave Oe-Kusi Ambenu nian. Nomeia mós Sekretáriu Rejionál Autoridade na’in-neen, ida-idak ho responsavel espesífika iha área krusiál sira rejiaun ne’e nian.

Projetu daruak Rezolusaun Governu nian, haree ba kriasaun Komisaun Ezekutiva ida ho objetivu atu estabelese Zona Ekonómika Dezenvolvimentu Espesiál ida iha Oe-kusi Ambenu. Desizaun hodi kria komisaun ida-ne’e mai ho konxiente  katak, hafoin kuaze dékada ida dezde ninia kriasaun, projetu atu estabelese Zona Espesiál Ekonomia Sosiál Merkadu ida, la alkansa objetivu sira ne’ebé propoin ona. Populasaun la haree-hetan Zona Espesiál ne’e bele atende sira-nia nesesidade ekonómika no sosiál, tanba ne’e hamosu beibeik dúvida kona-ba ninia papél no impaktu efetivu.

Komisaun Ezekutiva sei iha responsabilidade hodi prepara, iha prazu fulan 12, estudu detalladu ida ba implementasaun Zona Ekonómika Espesiál ida iha Oe-kusi Ambenu. Estudu ne’e sei inklui objetivu espesífiku, planu implementasaun no orsamentu ne’ebé nesesáriu.

Nomeia João Mendes Gonçalves nomeia nu’udár Koordenadór Komisaun, enkuantu dezigna Régio da Cruz Salu no Herculano de Sousa nu’udár Vise-Koordenadór.

Medida sira-ne’e hatudu kompromisu Governu nian atu hadi’a dezenvolvimentu ekonómiku no sosiál iha Oe-kusi Ambenu, ho hametin ninia autonomia no hatán ba nesesidade reál sira populasaun nian. Governu ne’e iha konfiansa katak asaun sira-ne’e sei kontribui maka’as ba dezenvolvimentu rejiaun ne’e no hadi’a kualidade moris ba ninia abitante sira.