Prezidente hosi ONG xineza GX Foundation, Leung Chunying, ohin, loron 23 fulan-janeiru tinan 2024, entrega ona ekipamentu no produtu sira ba protesaun kontra denge tonelada 10 resin ba Primeiru-Ministru, Kay Rala Xanana Gusmão, no Vise-Ministru ba Fortalesimentu Institusionál Saúde, José dos Reis Magno, iha serimónia ida ne’ebé hala’o iha Ministériu Saúde, Dili. Serimónia ne’e konta ho prezensa husi Embaixadora Xina iha Timor-Leste, Wang Wenli, no Diretora Ezekutiva GX Foundation nian.

Doasaun ne’e, besik dolar amerikanu millaun 1, ne’e hanesan parte integrante husi projetu pilotu ho naran “Protesaun Saúde Kontra Denge iha Timor-Leste”, ho durasaun ida ne’ebé prevee ba fulan 9. Projetu ne’e abranje instalasaun médika liu 300 iha territóriu laran tomak, ne’ebé inklui ospitál, sentru saúde komunitáriu no postu saúde sira.

Objetivu prinsipál husi projetu ida-ne’e maka atu implementa abordajen ida ne’ebé abranjente ba luta kontra denge, liuhusi prevensaun, protesaun, sensibilizasaun no diagnóstiku prekose (diagnóstiku ne’ebé halo kedas bainhira sintoma ne’e hahú mosu) ho doasaun lámpada moskiteiru, rede moskiteiru, armadilla autokolante no teste rápidu ba denge, nune’e mós asaun ba edukasaun sanitária ba komunidade lokál, igreja no eskola sira.

GX Foundation ne’e, sai hanesan organizasaun xineza dahuluk hodi implementa projetu saúde públika iha Timor-Leste dezde reforsu ba relasaun sino-timorense (entre Xina no Timor-Leste) ne’ebé promove liuhusi asinatura ba parseria estratéjika ida ne’ebé abranjente iha fulan-setembru tinan 2023. 

Iha ninia diskursu durante serimónia ne’e, Prezidente GX Foundation, Leung Chunying, hato’o “gratidaun ba Governu Timor-Leste no parseiru sira seluk ne’ebé fó apoiu” ba projetu, “ne’ebé marka inísiu importante ida hosi parseria ida ne’ebé forte entre [organizasaun no Governu Timor-Leste] iha saúde públika”.

Leung Chunying, hatudu ninia konfiansa katak projetu ida-ne’e la’ós de’it “sei hametin liután konektividade no amizade entre povu Xina no Timor-Leste”, maibé mós sei hamenus risku ba infesaun denge, moras ida-ne’ebé “nu’udar ema hotu nia preokupasaun iha nivel mundiál” no iha ne’ebé “Sudeste Aziátiku maka rejiaun ida ne’ebé vulneravel”. 

Primeiru-Ministru, Kay Rala Xanana Gusmão, agradese ba GX Foundation ba dezenvolvimentu programa pilotu kona-ba protesaun kontra denge ne’ebé lais. Nia subliña mós katak “entre dezafiu barak iha Timor-Leste, susuk bele sai hanesan dezafiu ida-ne’ebé ki’ik-liu, maibé mós bele halakon ema nia vida”, tanba maske “halakon ona malária ho susesu”, laiha rejistu tranzmisaun lokál husikedas tinan 2018”, “denge sirkula makaas iha komunidade, no labarik sira vulneravel tebes”.

Xefe Governu hateten katak nia hetan “onra” hodi “hasoru filafali Prezidente Xi Jinping, iha Hangzhou iha fulan-setembru tinan kotuk”, iha ne’ebé hetan ona akordu atu “hasa’e ita-nia relasaun bilaterál ba parseria estratéjika ida ne’ebé abranjente”, ho “doasaun husi XG Foundation ba asisténsia umanitária prátika hodi tulun ita atu hamenus risku denge ne’ebé hanesan pasu pozitivu ida iha parseria ida-ne’e”.