……………………………………………………………………………………………………………
Komunikadu Imprensa
Governo manifesta profundu pezar ba Ministru Justisa, Amândio de Sá Benevides nia mate
Ho laran triste ne’ebé kle’an Governu Timor-Leste ohin, loron 20 fulan-janeiru tinan 2024, simu notísia, kona-ba Ministru Justisa, Amândio de Sá Benevides ninia mate ne’ebé ita hotu la espera.
Moris iha loron 6 fulan-jullu tinan 1964, iha Munisípiu Ainaru, Amândio de Sá Benevides, koñesidu nu’udar advogadu, ne’ebé kontribui ona ho signifikativu ba dezenvolvimentu jurídiku no promove direitus umanus iha Timor-Leste.
Hafoin remata ninia estudu iha direitu konstitusionál iha Universidade Cendana iha Kupaun, Indonézia, iha tinan 1990, Benevides fila mai Dili, iha ne’ebé ezerse advokasia, husi tinan 1991 to’o 1993. Husi tinan 1993 to’o 1999 hanesan funsionáriu públiku, no durante períodu ida ne’e, nia tuir kursu oioin iha área administrasaun públika no jestaun.
Durante Administrasaun Tranzitória Nasoins Unidas (UNTAET), nia sai mós hanesan Prokuradór Públiku timoroan nian badalauluk ne’ebé hala’o kna’ar iha Administrasaun Sérgio Vieira de Mello ninia okos, iha fulan-abríl tinan 2000. Nia nomeia nu’udar Adjuntu Prokuradór-Jerál ba Krime Komún iha loron 16 fulan-outubru tinan 2001, kargu ida ne’ebé nia asume to’o tinan 2005.
Iha tinan 2005, nia mós remata ninia pos-graduasaun iha Estudu Anti-Korrupsaun, iha Universidade Space Honkong, iha Repúblika Populár Xina.
Husi tinan 2005 to’o tinan 2010, okupa kargu hanesan Provedór-Adjuntu Provedoria Direitus Umanus e Justisa (PDHJ).
Iha tinan 2017, nia simu louvór husi Prezidente Parlamentu Nasionál, Adéritu Hugo da Costa, ba ninia serbisu nu’udar asesór jurídiku iha ninia Gabinete, hanesan rekoñesimentu ba kolaborasaun exelente no kualifikada ne’ebé nia presta ona no ba kompetésia, dedikasaun, antusiazmu no lealdade ne’ebé manifesta ona uainhira hala’o funsaun hirak ne’e, hanesan rezultadu husi ninia karreira ne’ebé luan no relevante nu’udar jurista no iha área barak Direitu nian”.
Iha loron 1 fulan-jullu tinan 2023, simu pose hanesan Ministru Justisa iha Governu Konstitusionál IX nian.
Ministru Prezidénsia Konsellu Ministru no Portavós Governu, Agio Pereira hato’o ninia “tristeza kle’an tanba lakon jurista di’ak ida no servidór públiku ne’ebé iha dedikasaun”. Governante ne’e manifesta sinsera kondolénsia ba família enlutada no ba timoroan hotu ne’ebé sente triste iha momentu ida ne’e. Amândio de Sá Benevides sei nafatin relembra la’ós de’it tanba ninia kompeténsia profisionál, maibé mós tanba ninia kompromisu ne’ebé la nakdoko ho justisa no direitus umanus iha Timor-Leste”. REMATA