Ministru Prezidénsia Konsellu Ministrus, Agio Pereira, no Ministru Administrasaun Estatál, Tomás do Rosário Cabral, simu Kardeál Arsebispu Arkidioseze Metropolitana Dili, Dom Virgílio do Carmo da Silva, SDB no reprezentante Santa Sé iha Timor-Leste, Monseñór Marco Sprizzi, iha loron 18 fulan-janeiru tinan 2024, iha Palásiu Governu, Dili. 

Sorumutuk ida-ne’e marka diálogu dahuluk entre governantes no Kardeál Virgílio do Carmo da Silva husikedas Governu Konstitusionál IX simu pose, ho objetivu maka atu troka kumprimentus, votus tinan prósperu no aprezentasaun badak ida kona-ba polítika no modus operandi Governu Konstitusionál IX.

Durante sorumutuk ne’e, sira ko’alia kona-ba prioridades governu no Orsamentu Jerál Estadu ne’ebé detalla ba tinan 2024, nune’e mós tema ne’ebé iha relasaun ho kompozisaun no estrutura Governu Konstitusionál IX nian. 

Sua Eminénsia Dom Virgílio do Carmo da Silva, SDB, hato’o ninia agradesimentu ba Governu liuhusi konvite ba sorumutuk ida-ne’e no aproveita okaziaun hodi fahe informasaun kona-ba atividade karákter sosiál, edukativu no governu ekleziál Igreja Katólika nian iha país ne’ebé programa ona ba tinan 2024, ba benefísiu sosiedade timoroan tomak nian.

Governantes hato’o sira-nia satisfasaun ba realizasaun diálogu konstrutivu ida-ne’e ho Igreja, no rekoñese importánsia kolaborasaun no kooperasaun entre instituisaun sira hodi promove moris-di’ak no dezenvolvimentu nasionál.