Timor-Leste simu pakote foun ba pasaporte no Ministériu Justisa lansa sistema ejendamentu online ba pedidu pasaporte
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Timor-Leste simu ona remessa foun pasaporte no Ministériu Justisa lansa sistema agendamentu online ba pedidu pasaporte
Iha loron 15 fulan-janeiru tinan 2024, simu pakote daruak husi kaderneta pasaporte, ho totál hamutuk unidade 20,660 husi tipu haat pasaporte. Prevee ona mós atu to’o tan mai ho totál hamutuk unidade 16,000 iha loron 19 oinmai, no pakote sira seluk sei mai iha semana oin, to'o halo totál hamutuk unidade kaderneta pasaporte 57,102 ne’ebé presiza ba konsumu iha tinan 2024.
Iha hela mós prosesu akizisaun ba tinan ida-ne’e tan kaderneta pasaporte totál hamutuk unidade 20,000 liuhusi adenda ida ba kontratu ne'ebé selebra ona ho fornesedór, tanba ne'e, konsesaun pasaporte ba sidadaun sira sei la’o fali hanesan baibain.
Ministériu Justisa mós hakarak hahú kedas prosedimentu aprovizionamentu foun ida atu hetan tan kaderneta pasaporte hamutuk unidade 150,000 ba konsumu iha tinan oin.
Aleinde ne’e, aban, loron 18 fulan-janeiru tinan 2024, Ministériu Justisa liuhusi Diresaun-Jerál Servisus Rejistu no Notariadu, sei lansa aplikasaun ida ba pedidu ajendamentu online atubele hetan atendimentu iha momentu ne'ebé sei tuirmai ba emisaun pasaporte ba sidadaun hotu-hotu, ho objetivu atu garante efisiénsia no efikásia servisu ne’ebé boot tebes ba emisaun pasaporte ba sidadaun sira no atu evita bou malu iha fatin atendimentu. REMATA
