Iha loron 18 fulan-dezembru, Ministru Prezidénsia Konsellu Ministrus, Agio Pereira, hala’o sorumutuk ida iha Palásiu Governu, Dili ho Enkarregada Negósius Embaixada Austrália nian iha Timor-Leste, Caitlin Wilson, hodi diskute kooperasaun bilaterál. Durante sorumutuk ne’e, sira diskute prioridade Governu no Orsamentu Jerál Estadu nian ba tinan 2024, ne’ebé daudaun ne’e diskute hela iha Parlamentu Nasionál, no ne’ebé sintetiza objetivu estratéjiku hosi Programa Governu Konstitusionál IX iha pilár fundamentál rua: setór produtivu no kapitál sosiál, atu kontribui ba konstrusaun futuru ida ne’ebé prósperu no sustentável. Governu hakarak investe iha infraestrutura públika, kapasidade produsaun, empregu, no iha setór ekonómiku ne’ebé diversifikadu hodi dudu kreximentu ekonómiku. Iha tempu hanesan, Governu hakarak konsentra iha investimentu hodi hadi’a kualidade moris sidadaun nian iha área sira hanesan edukasaun, saúde, inkluzaun, kombate ba moris-ki’ak, no protesaun ambientál.

Governante no diplomata ne’e diskute mós kona-ba kooperasaun bilaterál ne’ebé mak iha ona área oioin, hanesan defeza no seguransa, desentralizasaun, justisa no iha área estratéjiku sira hanesan projetu expansaun Aeroporto Internacional Presidente Nicolau Lobato no instalasaun kabu fibra ótika. Mobilidade traballadór mós sai hanesan tema iha sorumutuk ne’e, liuliu liuhusi hatudu vontade atu haluan ámbitu husi Programa Mobilidade Laborál hodi inklui área téknika no kualifikadu sira, hanesan otelaria.