INPEX, empreza boot liu iha esplorasaun no produsaun petróleu no gás iha Japaun, hato’o ninia interese atu investe iha setór petróleu no gás iha Timor-Leste, durante sorumutuk ida ho Primeiru-Ministru, Kay Rala Xanana Gusmão, ne’ebé akompaña husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, no husi Vise-Ministra Asuntus ASEAN, Milena Maria da Costa Rangel, hamutuk ho Embaixadór Timor-Leste iha Japaun, Ilidio da Costa Ximenes, iha otél The Okura Tokyo, kapitál japoneza, iha loron 15 fulan-dezembru tinan 2023.

INPEX Corporation, empreza japoneza ida ne’ebé ho esperiénsia boot liu iha dezenvolvimentu indústria petrolífera iha Japaun, ho investimentu iha setór enerjétiku iha nasaun oioin.

Prezidente INPEX Corporation, Takayuki Ueda, hato’o ninia agradesimentu no priviléjiu husi sorumutuk ho Primeiru-Ministru Xanana Gusmão no ninia ekipa, ba oportunidade hodi bele diskute posibilidade investimentu iha Timor-Leste. 

Primeiru-Ministru, Kay Rala Xanana Gusmão, konvida INPEX Corporation atu halo vizita ida mai Timor-Leste hodi koñese país ne’e no avalia oportunidade investimentu iha setór petróleu no gás.

Durante sorumutuk ne’e ko’alia kona-ba planu dezenvolvimentu Greater Sunrise, iha ne’ebé Estadu Timor-Leste, ne’ebé reprezenta husi Timor GAP, E.P, kaer partisipasaun boot-liu 56,56%, tuir Woodside (operadora) ho 33,44% no Osaka Gas ho 10%.