Tuir diskursu ne’ebé hato’o husi Primeiru-Ministru, Kay Rala Xanana Gusmão iha simu pose Governu Konstitusionál IX nian, ne’ebé ezije dixiplina no neutralidade husi parte Forsas Defeza no Seguransa hodi hala’o sira-nia funsaun, realiza ohin, loron 7 fulan-dezembru tinan 2023, iha Palásiu Governu, serimónia “Kompromisu Onra Institusionál”.

Iha serimónia ne’e, membru forsa defeza no polísia ne’ebé molok ne’e identifika ona envolve an iha organizasaun polítika no grupu arte marsiál no rituál, halo kompromisu hodi dada an hosi organizasaun hirak ne’e, kompromete atu dezempeña sira-nia funsaun ho dixiplina, integridade no neutralidade tomak. 

Asaun no envolvimentu membru sira ne’e iha organizasaun sira hanesan ne’e kontribui ona ba epizódiu instabilidade no laiha trankuilidade públika iha Timor-Leste, liuliu iha Dili, kompromete kredibilidade instituisaun defeza no seguransa nian iha papél krusiál atu garante pás no seguransa ba dezenvolvimentu nasionál.

Imparsialidade, nu’udar karakterístika obrigatória hosi profisionál sira ne’ebé aplika lei, hanesan fatór ida ne’ebé importante tebetebes hodi mantein konfiansa no integridade iha sistema justisa, tanba ne’e importante tebetebes ba membrus forsas defeza no polísia atu kompromete hodi trata sidadaun hotu-hotu ho maneira justa no imparsiál, la haree ba ninia afiliasaun polítika no organizasaun ne’ebé sidadaun ida hamahan-na ba. 

Primeiru-Ministru, afirma filafali ninia kompromisu atu hametin pás no seguransa ne’ebé presiza ba dezenvolvimentu nasionál, ko’alia mós importánsia atu garante katak membru Forsas Defeza no Seguransa sira hotu atua ho neutralidade no profisionalizmu hodi defende Estadu, Nasaun no sidadaun sira hotu, ne’ebé defende pás no estabilidade iha komunidade liuliu iha joven sira-nia leet no interese Nasaun nian ne’ebé di’ak liu. 

Na’i-ulun ne’e mós destaka katak, membrus forsa defeza no seguransa ne’ebé halo ona juramentu ba grupu arte marsiál no rituál presiza renunsia (dada- an) hosi sira-nia lasu juramentu amizade nian, ka, sai husi Forsas Defeza no Seguransa, tanba organizasaun sira ne’e kria klima kriminalidade no estraga valór família no valór morál.

Serimónia ida-ne’e reforsa kompromisu Governu nian atu asegura katak Forsas Defeza no Seguransa dezempeña papél ida ne’ebé importante tebetebes hodi proteje direitu, liberdade no garantia fundamentál sidadaun sira hotu nian, nune’e bele kontribui ba konfiansa no integridade iha sistema justisa nasionál.