Enserramentu komemorasaun Loron Mundiál ba Ema ho Defisiénsia iha Timor-Leste prezide husi Primeiru-Ministru, Kay Rala Xanana Gusmão, akompaña husi Ministra Solidariedade Sosiál no Inkluzaun, Verónica das Dores, no Diretór Ezekutivu husi Asosiasaun Defisiente Timor-Leste (ADTL), Cesário da Silva, iha Centro de Convenções de Díli, iha loron 3 fulan-dezembru tinan 2023. 

Selebrasaun hirak ne’e, hala’o durante loron tolu, husi loron 1 to’o 3 fulan-dezembru, ho tema “Unidade iha Asaun atu Salva no Alkansa Metas Dezenvolvimentu Sustentável ba no hamutuk ho Ema ho Defisiénsia”. Eventu ne’e ho objetivu atu promove inkluzividade, prosperidade, reziliénsia, sustentabilidade no asesibilidade ba ema ho defisiénsia. Inisiativa ne’e konta ho partisipasaun husi ema ho defisiénsia iha Timor-Leste laran tomak iha atividade kulturál, desportiva oioin, iha semináriu no marxa ida no konsertu. 

Xefe Governu destaka importánsia hosi komemorasaun ida-ne’e tanba “ho selebrasaun loron ida-ne’e ho liafuan orden inkluzividade, ita destaka katak ema ho defisiénsia tenke partisipa kompleta, sei la esklui ema ho defisiénsia, tanba inkluzividade promove prosperidade.” Na’i Ulun ne’e hateten mós katak “liuhusi promove kontribuisaun husi ema hotu iha sosiedade, maka sosiedade ne’e sai reziliente liután.” “Bainhira ita hasoru dezafiu sira, ita persiste, hodi hatudu ita-nia reziliénsia. Ita fiar katak, ho ita-nia asesibilidade, ita bele kontribui no dezempeña papél krusiál ida iha dezenvolvimentu sustentável nasaun nian”. 

Xanana Gusmão reafirma “kompromisu husi Governu IX atu apoia sidadaun timoroan hamutuk rihun 93 ne’ebé moris ho defisiénsia, kompromisu ida-ne’e la’ós karidade, maibé nu’udar hatudu konfiansa no fiar iha partisipasaun sidadaun sira-ne’e nian iha konstrusaun Estadu”.

Ministra Verónica das Dores garante katak “Governu sei la husik ba kotuk ema ho defisiénsia” no “lori Governu Konstitusionál IX nia naran, liuhusi Ministériu Solidariedade Sosiál no Inkluzaun, enkoraja sosiedade sivíl tomak, liuliu organizasaun sira ba ema ho defisiénsia, atu hamutuk ho Governu iha asaun konjunta sira. Ho objetivu atu hetan dalan ba implementasaun programas no prioridades ne’ebé Governu iha ona, ho objetivu atu alkansa Objetivus Dezenvolvimentu Sustentável iha Timor-Leste. Servisu ida-ne’e rekere kolaborasaun kontínua ida ho Organizasaun sira ba Ema ho Defisiénsia no sira-nia família. 

Diretór Ezekutivu husi ADTL hato’o ninia agradesimentu ba Primeiru-Ministru no ba Governu tanba fó ” prioridade ba apoiu ba ema ho defisiénsia” no hahí “polítika Governu nian ne’ebé promove talentu no abilidade husi ema sira ho defisiénsia, hodi integra sira iha prosesu konstrusaun Estadu.