Governu anunsia inisiativa ho títulu “Prezépiu ba Fulan Dame nian”, ne’ebé ho objetivu atu fó prémiu ba prezépiu nasionál sira ne’ebé di’ak liu ho objetivu atu promove dame, estabilidade, laiha violénsia no unidade iha ita-nia país.

Kompetisaun ne’e, loke ba suku hotu-hotu iha Dili no kapitál sira hotu munisípiu nian, sei fó oportunidade ida ba ita-nia povu hodi hatudu sira-nia kriatividade no espresa mensajen dame nian liuhusi prezépiu natal tradisionál. Insentiva partisipasaun ne’e hanesan jestu koletivu ida ne’ebé defende valór fundamentál ba moris-di’ak ita-nia sosiedade nian.

Sei konvida suku hotu-hotu iha Dili atu partisipa iha kompetisaun ne’e. Prezépiu lima ne’ebé di’ak liu maka sei hetan prémiu ho valór osan.

Inisiativa ne’e abranje ba munisípiu hotu-hotu, iha ne’ebé prezépiu tolu ne’ebé di’ak liu maka sei hetan prémiu. Kompetisaun ne’e abranje de’it ba kapitál iha kada munisípiu, la inklui postu administrativu sira seluk.

Prezépiu hirak ne’e sei hetan avaliasaun bazeia ba kriatividade, orijinalidade no kapasidade atu tranzmite mensajen dame nian. Suku sira Dili nian ka kapitál sira Munisípiu nian de’it ne’ebé sei garante pás, estabilidade no laiha violénsia to’o loron 31 fulan-dezembru maka sei bele hetan prémiu, maske molok ne’e sira iha ona kualifikasaun.

Inisiativa ida-ne’e, la’ós de’it atu selebra festa natál, maibé mós destaka importánsia husi valór fundamentál ne’ebé kontribui atu harii sosiedade ida ne’ebé iha armonia.

Governu fiar katak kompetisaun ida-ne’e la’ós de’it sei promove kriatividade artístika ita-nia populasaun nian, liuliu ita-nia foin sa’e sira, maibé mós sei hametin kompromisu populasaun hotu-hotu nian atu kontribui ba dame no armonia.

Ami apela ba ema hotu-hotu atu partisipa ativa iha inisiativa ida-ne’e, hodi kontribui atu garante país ida ne’ebé unidu no hakmatek liu.