Governu Timor-Leste, liuhusi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, ofisiálmente, asina akordu bilaterál ida ho Brunei Darussalam kona-ba programa haruka traballadór sira husi Timor-Leste ba país ne’ebá, iha loron 27 fulan-outubru tinan 2023. 

Molok asina akordu ne’e, Vise-Primeiru-Ministru, hamutuk ho Ministru Negósius Estranjeirus no Kooperasaun, Bendito dos Santos Freitas, partisipa iha vizita  Estadu Prezidente Repúblika, José Ramos Horta, hodi hala’o sorumutuk bilaterál ida ho Liurai Brunei Darussalam, Hassanal Bolkiah ibni Omar Ali Saifuddien III, iha Palásiu Nurul Iman. 

 Vizita Prezidente Ramos-Horta nian ba Brunei Darussalam hodi hatán ba konvite husi Liurai Brunei Darussalam, Hassanal Bolkiah ibni Omar Ali Saifuddien III, Timor-Leste nia belun di’ak ida, husi kedas estabelesimentu relasaun diplomátika entre país rua ne’e iha loron 20 fulan-maiu tinan 2002.