Governu determina suspensão kona-ba ensinu, aprendizajen no prátika artes marsiais ho adosaun (ka foti) medidas hodi assegura ordem públika
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 10 fulan-novembru tinan 2023
Komunikadu Imprensa
Governu determina suspensão kona-ba ensinu, aprendizajen no prátika artes marsiais ho adosaun (ka foti) medidas hodi assegura ordem públika
Hodi konsidera insidentes todan boot ne'ebé regista iha loron ikus hirak nia laran, foin daudaun ne’e, no iha fatin ketaketak iha territóriu nasionál ne’ebé́ envolve elementos sira ne’ebé́ pertense ba grupos artes marsiais, ne'ebé rezulta ema na’in haat mate, ema na’in 26 feridu, no estragu material iha uma 21 no iha veikulus 10, Governu determina, liuhusi Rezolusaun Governu n.º 45/2023, husi loron 10 fulan-novembru, suspensaun ba ensinu, aprendizajen no prátika artes marciais no artes rituais iha territóriu nasionál tomak, durante fulan 6. Determina mós suspensaun ba autorizasaun funsionamentu husi sentru, klube no eskola sira ne'ebé destina ba prátika artes marciais, no determina mos enserramentu (taka) fatin no instalasoins hotu-hotu ne'ebé destina ba ensinu, aprendizajen, no prátika artes marciais, durante fulan 6.
Ho Rezolusaun ida-ne'e, Governu instrui (fó-orden ba) Komisaun Reguladora ba Artes Marciais, atu, iha loron 90 nia laran, halo asaun fiskalizasaun, hodi identifika sentrus, klubes no eskolas hotu-hotu ne'ebé destina ba ensinu, aprendizajen no prátika artes marsiais, hodi identifika indivíduu sira ne'ebé responsável ba organizasaun no ensinu artes marsiais nian, no idenfifika mos proprietáriu sira husi fatin sira no instalasoins iha ne'ebé atividade artes marsiais hala’o, ho autorizasaun ka sein autorizasaun, iha territóriu nasionál tomak, aprezenta relatóriu ho rezultadu husi levantamentu ne’ebé hetan ba Governu, no informa Polísia Nasionál Timor-Leste no autoridade sira seluk ne'ebé kompetente kona-ba rezultadu husi fiskalizasaun no identifikasaun ne’e.
Polísia Nasionál Timor-Leste (PNTL) sei realiza operasaun espesiál ba prevensaun kriminál iha área jeográfika iha ne'ebé akontese insidente violénsia relasionadu ho prátika artes marsiais, tuir artigu 33.º Lei n.º 5/2017, loron 19 fulan-abril. PNTL sei realiza mós operasaun prevensaun kriminál sira seluk ne'ebé presiza atu previne no kontrola atu ilísitu sira relasionadu ho prátika artes marsiais, liuliu iha Díli no iha área sira seluk nasaun nian, iha ne'ebé iha risku boot liu atu akontese insidente sira.
Ho Rezolusaun Governu ne'e nian, Ministru Interior no Ministru Defeza sei hetan instrusaun atu halo dilijénsias (foti medidas) ne'ebé presiza hodi identifika agentes husi forsa polísia no forsa militár ne'ebé envolve iha organizasaun ka prátika artes marsiais. Sira sei promove mos asoins sensibilizasaun no formasaun ba agentes polísia no militár sira kona-ba política toleránsia zero husi Governu ba sira-nia partisipasaun iha organizasaun artes marsiais.
Governu fó instrusaun funsionáriu, agente administrasaun públika no pessoal kontratadu hotu-hotu atu kumpre Kódigu Étika tomak, liuliu kona-ba envolvimentu iha prátika ilísita ne’ebé relasiona ho artes marsiais no apela ba sidadaun no lideransa komunitária hotu-hotu atu kolabora ho autoridade seguransa sira, hodi identifika prátika ilísita artes marciais nian.
Ministru Juventude, Desporto, Arte no Kultura hetan responsabilidade hodi promove inisiativa sira ne'ebé presiza atu sensibiliza populasaun, liuliu foin-sa’e, kona-ba importánsia atu pratika desportu ho saudavel. Ministru Juventude, Desporto, Arte no Kultura mos iha responsabilidade atu adota atus ne'ebé presiza hodi implementa no kumpre Rezolusaun ida ne’e ho forma integrál liuliu kona-ba suspensaun ba atividade no enserramentu (taka) sentru, klube no eskola sira ne'ebé destina ba prátika artes marsiais. REMATA
Hodi lee Rezolusaun Governu nian nu. 45/2023, loron 10 fulan-novembru, klike iha-ne'e!
