Ministru Prezidénsia Konsellu Ministrus, Agio Pereira, ne’ebé reprezenta Primeiru-Ministru, Kay Rala Xanana Gusmão, sei partisipa iha Sorumutuk Líderes Fórum Illas Pasífiku nian ba da-52, ne’ebé sei hala’o husi loron 6 to’o loron 10, fulan-novembru tinan 2023, iha Rarotonga, Illas Cook, ho tema “Ami-nia Lian, Ami-nia Eskolla, Ami-nia maneira atu sai Pasífiku-oan: Promove, Koopera, Prospera”.

Fórum Illas Pasífiku nu’udar organizasaun rejionál ne’ebé halibur líder polítiku sira husi nasaun oin-oin no territóriu illa sira iha rejiaun Pasífiku, ho objetivu atu promove kooperasaun no diálogu entre nasaun no territóriu sira iha rejiaun Pasífiku kona-ba asuntu sira ne’ebé komún, hodi inklui asuntu polítiku, ekonómiku, sosiál no ambientál.

Fórum ne’e estabelese iha tinan 1971 no kompoin husi nasaun 18 ne’ebé sai hanesan membru plenu sira, nu’udar nasaun sira ne’ebé independente iha rejiaun Pasífiku, no mós membru asosiadu no observadór sira, ne’ebé inklui nasaun no organizasaun sira ne’ebé hakarak kolabora no koopera ho rejiaun Pasífiku. Fórum ne’e mós inklui Sekretariadu Fórum Illas Pasífiku nian, ne’ebé fó apoiu administrativu no organizasionál ba atividade sira Fórum nian.

Nasaun 18 ne’ebé nu’udar membru sira Fórum Illas Pasífiku nian mak Austrália, Estadu Federadu sira Micronézia nian, Fiji, Illas Cook, Illas Marshall, Illas Salomão, Kiribati, Nauru, Nova Kaledónia, Nova Zelándia, Niue, Palau, Papua-Nova Guiné, Polinézia Franseza, Samoa, Tonga, Tuvalu no Vanuatu. Timor-Leste ho nia estatutu hanesan observadór iha Fórum Illas Pasífiku nian.