Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha loron 23 fulan-outubru tinan 2023, reprezenta Primeiru-Ministru, Kay Rala Xanana Gusmão, prezide inaugurasaun ba Semana Internasionál Kompeténsias nian Timor-Leste ba Dahuluk no Sorumutuk hosi Konsellu Administrasaun SEAMEO VOCTECH ba da-34.

SEAMEO VOCTECH, Sentru Rejionál husi Organizasaun Ministrus Edukasaun, husi Sudeste Aziátiku, ne’ebé estabelese ona iha tinan 1990 iha Brunei Darussalam, iha misaun ida atu apoia país membrus SEAMEO nian iha identifikasaun no rezolusaun dezafiu komún sira iha domíniu edukasaun profisionál no téknika. Atu kumpre dezígniu ida-ne’e, SEAMEO VOCTECH promove inisiativa oioin ne’ebé abranje dezenvolvimentu profisionál, investigasaun, konsultoria no promove kolaborasaun entre Governu, instituisaun sira ensinu nian no interveniente sira seluk. País sira ne’ebé inklui iha SEAMEO VOCTECH maka, Brunei Darussalam, Kamboja, Indonézia, Laos, Malázia, Myanmar, Filipinas, Singapura, Tailándia, Timor-Leste e Vietname. 

Iha ninia intervensaun, Francisco Kalbuadi Lay, destaka importánsia husi eventu ida-ne’e nian hanesan “plataforma atu realsa importánsia hosi dezenvolvimentu kompeténsia hodi hetan dezenvolvimentu sustentavel no promove inovasaun iha Timor-Leste”.

Vise-Primeiru-Ministru salienta katak “dezenvolvimentu kompeténsia importante tebetebes ba susesu no prosperidade nasaun hotu-hotu nian” atu “fornese koñesimentu, abilidade no atitude ne’ebé ema sira presiza hodi partisipa ho efikásia iha sira-nia komunidade no ekonomia”.

Hatutan tan katak “ho investimentu iha formasaun profisionál no téknika, país sira bele fó ba sira-nia sidadaun kompeténsia nesesária sira atu tama iha merkadu serbisu, kria kreximentu ekonómiku no hasoru kestaun sosiál sira, hodi investe iha formasaun profisionál no téknika”.

Partisipa mós iha eventu ne’e, maka Ministra Edukasaun, Dulce de Jesus Soares, Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, no Sekretáriu Estadu Kooperativas, Arsénio Pereira da Silva.