Ministra Edukasaun, Dulce de Jesus Soares, reprezenta Timor-Leste iha Simeira Globál Koligasaun Alimentasaun Eskolár dahuluk nian, ne’ebé hala’o iha Paris, Fransa, husi loron 18 to’o loron 19 fulan-outubru, ho tema “Han-hemu eskola nian ka “Refeisaun Eskolar”, ba futuru ida ne’ebé igualitáriu no inkluzivu liu”. 

Koligasaun ida-ne’e, lansa husi Fransa no Finlándia iha tinan 2021, ho apoiu hosi Programa Alimentár Mundiál (PAM), ho objetivu atu asegura katak to’o tinan 2030 labarik sira hotu iha mundu iha asesu ba han-hemu eskola nian ne’ebé saudavel.

Han-hemu eskola nian dezempeña papél ida ne’ebé importante tebetebes hodi hasoru problema sira hanesan hamlaha, sistema alimentár ne’ebé la sustentavel no dezafiu edukasionál sira, ho énfaze iha igualdade jéneru. Aleinde fó benefísiu saúde no edukasaun ba labarik sira, han-hemu eskola nian kria mós serbisu no promove sistema alimentár sustentavel sira. 

Koligasaun daudaun ne’e halibur Estadu-Membru hamutuk 90, Uniaun Europeia no Uniaun Afrikana, hamutuk ho parseiru oioin besik 100. Simeira iha fulan-outubru ho objetivu atu ko’alia-liu kona-ba progresu sira no rona mós hanoin husi parte sira ne’ebé envolve iha implementasaun han-hemu eskola nian loron-loron, inklui autoridade lokál no rede parlamentár nian sira. Koligasaun ne’e maka nu’udar ezemplu ida ba susesu husi parserias multilaterais iha rezolusaun dezafiu komún sira, hanesan kontributu krusiál ida hodi kombate inseguransa alimentár globál. 

Iha ninia intervensaun, durante simeira ne’e, Ministra Edukasaun elojia apoiu kontínuu hosi PAM hodi implementa programa merenda eskolár iha Timor-Leste, ne’ebé daudaun ne’e benefisia estudante sira hamutuk rihun 315.

Governante ne’e destaka desizaun nasionál atu “duplika kompromisu finanseiru ho programa nasionál merenda eskolár nian”, hodi rekoñese katak país ne’e sei “hasoru hela dezafiu sériu iha edukasaun, inklui kona-ba deznutrisaun no atrazu iha kreximentu.

“Aumentu signifikativu iha orsamentu ida-ne’e, hatudu dedikasaun husi [Governu] iha fornesimentu ba labarik sira iha Timor-Leste la’ós de’it iha edukasaun, maibé mós iha nutrisaun ne’ebé sira presiza hodi hetan susesu no sai nu’udár impulsionadór sira ba ita-nia progresu”, Governante ne’e hatutan. 

Dulce de Jesus Soares subliña mós katak “Programa merenda eskolár iha Timor-Leste la’ós fó benefísiu de’it ba estudante sira, maibé mós ba to’os-na’in lokál sira, no ba komunidade sira hotu ne’ebé envolve iha prosesu ida-ne’e”.

Ministra Edukasaun hato’o mós “orgullu iha promosaun to’os eskola nian sira, ne’e, hanesan grupu ki’ik ida, ka hanesan úniku país iha mundu ne’ebé inklui estudu no prátika to’os eskola nian hanesan disiplina kurrikulár nian ida, hodi fornese han-hemu eskola nian ho produtu fresku no nutritivu sira, ne’ebé iha mós impaktu ba saúde ba família ida-idak nian, no estudante sira sei lori prátika ida-ne’e fila-fali ba sira-nia família sira”.