Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 25 fulan-outubru tinan 2023

Konsellu Ministrus hala’o sorumutuk iha Palásiu Governu, Dili, no aprova ona projetu Rezolusaun Governu, ne’ebé aprezenta hosi Vise-Ministra Finansas, Felicia Claudinanda da Cruz Carvalho, kona-ba definisaun kompozisaun Komité Revizaun Polítiku ba Orsamentu Jerál Estadu tinan 2024.

Komité Revizaun Polítiku mak iha kompeténsia hodi verifika alokasaun estratéjika kona-ba rekursu submisaun orsamentál nian, ho objetivu atu atinje kompromisu no objetivu sira ne’ebé hatuur iha dokumentu estratéjiku no analiza kapasidade atu ezekuta planu ba tinan finanseiru 2024 nian.

Komité Revizaun Polítiku ne’e sei prezide hosi Primeiru-Ministru no mós kompostu hosi Vise-Primeirus-Ministrus, Ministra Finansas, Ministru Obras Públikas no hosi Ministru Planeamentu no Investimentu Estratéjiku. Sekretária Estadu Igualdade no Inkluzaun, Prezidente Institutu ba Defeza Direitus Labarik nian no reprezentante ida hosi Asosiasaun Defisiente Timor-Leste sei partisipa mós iha reuniaun sira Komité Revizaun Polítiku nian, hanesan observadór. Reuniaun Komité Revizaun Orsamentál nian sei hala’o hosi loron 24 fulan-outubru to’o loron 9 fulan-novembru, iha Auditóriu Ministériu Finansas nian.

Komité Revizaun Orsamentál tenke asegura kapasidade hodi ezekuta planu anuál ba servisus no entidades setór públiku administrativu nian no ninia konformidade ho prioridade nasionál sira ne’ebé define ona bazeia ba Planu Estratéjiku Dezenvolvimentu 2011 – 2030, iha Program Governu, planu ba médiu prazu no planu servisu anuál sira no entidade sira iha setór públiku administrativu, no iha dokumentu polítiku no estratéjiku sira seluk Governu nian. Alokasaun dotasaun orsamentál sira ba kada servisu ka entidade tenke tuir ninia planu anuál no respeita limite másimu despeza nian ne’ebé molok ne’e define ona ba kada títulu.

***

Konsellu Ministrus delibera ona hodi aprova tema “Selebra istória, harii futuru” ba komemorasaun 28 fulan-novembru iha tinan ida-ne’e, iha ne’ebé Timor-Leste selebra aniversáriu Proklamasaun Independénsia ba da-48.

 ***

Ikusliu, Konsellu Ministrus aprova projetu Dekretu Governu, ne’ebé aprezenta hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, kona-ba apoiu ba  dezenvolvimentu setór privadu.

Diploma ida-ne’e ho objetivu atu kria apoiu finanseiru espesiál ida ba asosiasaun sivíl sira sein fins lukrativus iha Timor-Leste, ne’ebé promove dezenvolvimentu setór privadu timoroan nian, ne’ebé harii no rejista ona asosiasaun sira-ne’e ho loloos iha loron ne’ebé diploma ida-ne’e hahú vigora.

Montante totál hosi kada apoiu la bele liu valór másimu dolar amerikanu rihun 100 (atus ida) kada entidade benefisiária no ho limite mínimu dolar amerikanu rihun 25 (ruanulu-resin-lima). Montante globál hosi apoiu finanseirus ne’ebé atu fó la bele liu dolar amerikanu rihun 150 (atus ida limanulu). REMATA