Timor-Leste no Indonézia iha loron 23 fulan-outubru tinan 2023, iha Jenebra, Suisa, finaliza akordu bilaterál kona-ba asesu ba merkadu servisu no beins iha ámbitu prosesu adezaun Timor-Leste nian ba Organizasaun Mundiál Komérsiu (OMK).

Akordu ne’e asina husi Embaixadora Lurdes Bessa, Reprezentante Permanente Timor-Leste nian iha Jenebra, ne’ebé reprezenta husi Ministru Koordenadór Asuntus Ekonómikus no Ministru Turizmu no Ambiente, atuál Xefe Negosiadór adezaun Timor-Leste nian ba OMK, Francisco Kalbuadi Lay. Husi parte Indonézia nian, akordu ne’e asina husi Embaixadór Febrian A. Ruddyard, Reprezentante Permanente Indonézia nian iha Jenebra.

Asinatura akordu ida ne’e marka ho konklui/remata ona negosiasaun bilaterál 9 husi negosiasaun bilaterál 10 ne’ebé Timor-Leste halo, ne’ebé signifika pasu importante ida ba integrasaun Timor-Leste nian iha sistema multilaterál komérsiu no ninia prosesu adezaun ba OMK. Akordu bilaterál hodi asesu ba merkadu servisu no beins ne’e reprezenta mós pasu signifikativu ida hodi promove kreximentu ekonómiku nasionál, relasaun komersiál no esforsu Timor-Leste nian hodi sai membru ASEAN, iha tempu ne’ebé hanesan hodi reforsa relasaun diplomátika entre Timor-Leste no Indonézia.

Vise-Primeiru-Ministru no Xefe Negosiadór Timor-Leste nia adezaun ba OMK, Francisco Kalbuadi Lay, ne’ebé partisipa iha serimónia liuhusi vídeokonferénsia, hateten katak “adezaun Timor-Leste nian ba OMK hanesan prioridade prinsipál ida” ne’ebé “Timor-Leste mós kompromete ona ho adezaun ba ASEAN”. Ba ida ne’e, na’i-ulun ne’e hateten “nia fiar tebes katak Indonézia sei kontinua hodi sai ita-nia parseiru komersiál ne’ebé importante liu, tantu iha ASEAN nune’e mós iha OMK.”

Iha sesaun boazvindas, Xefe Negosiadór Indonézia nian, Djatmiko Bris Witjaksono, Diretór-Jerál Negosiasaun Komérsiu Internasionál husi Ministériu Komérsiu Indonézia nian, hato’o ninia laran haksolok ho parseria ne’ebé la’o daudaun no nia hateten katak “ita-nia esforsu kolaborativu la limita de’it ba OMK, maibé mós nakloke ba aspirasaun Timor-Leste nian hodi adere ba ASEAN.”

Akordu ne’e hanesan rezultadu husi sorumutuk sira ne’ebé hala’o iha loron 11 fulan-outubru tinan 2023, durante Sorumutuk Grupu Traballu kona-ba Adezaun Timor-Leste nian ba OMK, iha Jenebra, Suisa, ne’ebé lidera husi Vise-Primeiru-Ministru Francisco Kalbuadi Lay.

Serimónia asinatura ne’e konta mós ho partisipasaun husi Embaixadór Rui Macieira, Reprezentante Permanente Portugál nian no Prezidente Grupu Traballu Adezaun Timor-Leste nian ba OMK, hamutuk ho Diretora Adezaun ba OMK, Maika Oshikawa, no funsionáriu sira ba misaun Timor-Leste no Indonézia nian iha Jenebra.