Ministru Prezidénsia Konsellu Ministrus, Agio Pereira, Agio Pereira, iha reprezentasaun Primeiru-Ministru, Kay Rala Xanana Gusmão, aprezenta ona, iha loron 23 fulan-outubru tinan 2023, iha Parlamentu Nasionál Konta Jerál Estadu husi tinan finanseiru 2022. Ministru Agio Pereira, iha debate Parlamentu Nasionál, akompaña husi Ministra Finansas, Santina José Rodrigues F.Viegas Cardoso, Ministra Solidariedade Sosiál e Inkluzaun, Verónica das Dores, Vise-Ministru Asuntus Parlamentares, Adérito Hugo da Costa, no husi Vise-Ministra Finansas, Felicia Claudinanda da Cruz Carvalho.

Dokumentu ne’e hetan aprovasaun ho lian-ida-de’it husi Parlamentu Nasionál ho votu afavór 57, laiha votu kontra no abstensaun.

Konta Jerál Estadu tinan 2022 nian ne’e prepara husi Ministériu Finansas, bazeia ba informasaun hirak ne’ebé fornese husi órgaun Governu no servisu públiku sira. Dokumentu ida ne’e abranje informasaun finanseiru lubun ida, ne’ebé inklui rezultadu agregadu no individuál husi entidade governamentál oioin, hanesan Fundu Konsolidadu Timor-Leste, Fundu Infraestruturas, Fundu Dezenvolvimentu Kapitál Umanu, no seluk-seluk tan. Konta Jerál Estadu ne’e, aprezenta ho detalle reseita no despeza nian sira ne’ebé hala’o durante tinan 2022, nune’e mós saldu finanseiru sira iha finál períodu refere.

Orsamentu Jerál Estadu ba tinan 2022 prevee despeza totál husi US$ 2.419.539.539, maibé despeza ne’ebé hala’o ho efetiva, inklui Administrasaun Sentrál, Rejiaun Administrativa Oekusi, Ambenu no Seguransa Sosiál nian hamutuk US$ 1 810 624 000, iha ne’ebé US$ 1 404 000 000 maihusi transferénsia Fundu Petrolíferu, ne’ebé korresponde ho taxa ezekusaun orsamentál besik 77% no hanesan montante despeza orsamentál boot liu ne’ebé ezekuta iha tinan ida. 

Maske debate ne’e konsentra ba Konta Jerál Estadu tinan finanseiru 2022 nian, no Governu IX laiha responsabilidade ba preparasaun no ezekusaun Orsamentu Jerál tinan 2022, Ministru Prezidénsia Konsellu Ministrus, iha ninia diskursu abertura debate nian, garante katak Governu IX iha empeñu “hodi implementa rekomendasaun hotu Kámara Kontas nian”, no tanba ne’e, sei kontinua “iha tinan hirak tuirmai inklui melloria metodolójika iha Orsamentu Jerál Estadu no iha Konta Jerál Estadu hodi respeita obrigasaun legál hotu no prátika kontabilístika internasionál  sira nian ne’ebé di’ak liu”.

Agio Pereira hateten katak” Ministériu Finansas kontinua serbisu hodi hadi’a sistema ezekusaun orsamentál no hodi aumenta transparénsia kontas públikas” no reitera katak “Governu iha empeñu hodi promove rasionalizasaun Administrasaun Públika no hodi atinje administrasaun ida ne’ebé efisiente, efikás no ekonómika liu”.