Toleránsia pontu iha loron 27 fulan-outubru tinan 2023
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 18 fulan-outubru tinan 2023
Komunikadu Imprensa
Toleránsia pontu iha loron 27 fulan-outubru tinan 2023
Ho hanoin katak iha loron 28 fulan-outubru tinan 2023 (sábadu) oinmai, sei hala’o eleisaun ba órgauns sukus no hodi konsidera katak eleitór barak mak atu ezerse sira-nia direitu votu, sira sei halo viajen ba munisípiu, nune’e mós ba Rejiaun Administrativa Espesiál Oekusi Ambenu.
Atu garante katak viajen sira ne’e la’o ho di’ak no regulár, hodi evita sira-nia konsentrasaun iha loron ida de’it, no haree ba prátika ne’ebé halo tuir ona iha tinan barak nia laran.
Governu ne’e, tuir alínea d) hosi n. 6 artigu da-7 husi Lei n. 10/2005, loron 10 fulan-agostu, ne’ebé altera ona husi Lei n. 3/2016, loron 25 fulan-maiu, deside ona hodi fó toleránsia-de-pontu ba funsionáriu, ajente no traballadór hotu-hotu iha administrasaun direta Estadu, tantu nivel sentrál, deskonsentradu no mós organizmus administrasaun indireta, iha loron 27 fulan-outubru tinan 2023, durante loron tomak.
La inklui rekursus umanus husi servisu públiku sira ne’ebé, tanba natureza husi atividade ne’ebé sira dezenvolve, tenke hala’o nafatin serbisu durante períodu ne’e. Sein prejuízu ba kontinuidade no kualidade husi servisu públiku ne’ebé mak atu presta, dirijente másimu sira husi servisu sira ne’ebé temi ona iha númeru anteriór tenke fó dispensa ne’ebé hanesan husi devér asiduidade nian ba funsionáriu sira ne’e, iha loron seluk, ne’ebé sei determina bazeia ba oportunidade. REMATA
