Ministra Solidariedade Sosiál no Inkluzaun (MSSI), Verónica das Dores, partisipa iha “Forum Altu Nivel ASEAN nian kona-ba Parserias no Dezenvolvimentu Inkluzivu ba Ema ho Defisiénsia tinan 2025 ba oin”, ne’ebé hala’o iha Makasar, Indonézia, hosi loron 10 to’o 12 fulan-outubru tinan 2023.

Objetivu hosi forum ida-ne’e atu hametin kolaborasaun rejionál no promove partilla prátikas inkluzivas ne’ebé di’ak, ne’ebé nu’udar plataforma krusiál ida ba debate kona-ba kapasitasaun no inkluzaun ba ema ho defisiénsia iha komunidade ASEAN. Forum ne’e konta ho partisipasaun husi ministrus no altu funsionárius ASEAN nian, ne’ebé responsavel ba protesaun sosiál no dezenvolvimentu ba organizmu setoriál sira ne’ebé iha relasaun, entidades afiliadas ba ASEAN no parseiru sira. Marka prezensa iha eventu ne’e, reprezentante sira husi país 13, inklui país membrus sia husi ASEAN, Timor-Leste hanesan observadór no país tolu hanesan parseiru ASEAN nian: Austrália, Estadus Unidus Amérika no Reinu Unidu.

Durante eventu ne’e, Ministra Verónica das Dores, ko ’alia-liu esforsu Governu Timor-Leste nian, liuhusi Ministériu Solidariedade Sosiál no Inkluzaun, hanesan signatáriu ba Konvensaun Internasionál Nasoins Unidas kona-ba Direitus Ema ho Defisiénsia no iha “kolaborasaun metin ho organizasaun ema ho defisiénsia no ministériu sira seluk, hodi promove igualdade no protesaun sosiál ba ema hotu, inklui sidadaun ho defisiénsia, tuir hatuur ona iha Artigu 21 Konstituisaun Repúblika Demokrátika Timor-Leste”. 

Kona-ba ida-ne’e, ukun-na’in ne’e destaka aprovasaun ba rezolusaun no polítika nasionál sira ne’ebé ho objetivu atu asegura direitus ema ho defisiénsia, ne’ebé Timor-Leste halo ona. Rezolusaun sira-ne’e permite Ministériu Solidariedade Sosiál no Inkluzaun, hamutuk ho entidade relevante sira seluk, atu “kolabora efetivamente hodi hametin inkluzaun ema ho defisiénsia no garante implementasaun atividades tuir orsamentu no programa governu nian”.

Ministra Verónica das Dores subliña kompromisu Estadu Timor-Leste nian hodi “kolabora ho komunidade internasionál iha promosaun inkluzaun ema ho defisiénsia, atu harii sosiedade inkluziva ida iha rejiaun ASEAN no ba mundu, ho determinasaun firme hodi la husik ema ida ba kotuk”. 

Iha eventu ne’e, Ministra hetan akompañamentu husi Diretór Jerál Solidariedade Sosiál no Inkluzaun, Florêncio Dias Gonzaga no Mateus da Silva husi Departamentu Nasionál ba Promosaun Direitus Ema ho Defisiénsia, hamutuk ho ninia ekipa.