……………………………………………………………………………………………………………
Dili, loron 18 fulan-outubru tinan 2023
Komunikadu Imprensa
Estudante timoroan sira iha Israel nafatin seguru no deside hodi hela iha país refere
Governu Timor-Leste informa katak sidadaun timoroan na’in-51 ne’ebé daudaun ne’e iha Israel, hodi tuir Kursu Agrikultura no Ortikultura, iha Sentru Internasionál Formasaun Agríkola Arava (AICAIT) nian, deklara ona katak sira hakarak nafatin hodi hela iha Israel, tanba, maske iha eskala konflitu entre Israel no territóriu Palestinianu sira, situasaun iha rejiaun ne’e hakmatek.
Desizaun ida-ne’e, tuir deklarasaun husi Diretora AICAIT, Dafna Gommershtadt, ne’ebé asegura ona “katak estudante sira iha Arava hotu-hotu di’ak no iha situasaun seguru” no hahú husi “loron-segunda, loron 16, estudante sira hahú fali ona sira-nia estudu”.
Hodi konsidera desizaun estudante sira nian ne’e no garante seguransa ne’ebé fornese husi Diretora AICAIT, Governu Timor-Leste deside ona hodi suspende kontaktu kona-ba haruka fila hikas estudante timoroan sira mai Timor-Leste. Maibé, Governu sei mantein kontaktu regulár ho sidadaun hirak-ne’e, hodi fornese informasaun atualizada no koordena ho autoridade relevante hodi garante sira-nia seguransa.
Portavós Governu, Ministru Agio Pereira, garante katak “kontinua halo vijilánsia ba situasaun, sai hanesan prioridade ida ba Governu Timor-Leste, ne’ebé sei foti medida adisionál sira, karik presiza, hodi asegura sidadaun sira-nia moris di’ak iha Israel”. REMATA