Ministériu Petróleu no Rekursus Minerais, halo parseria ho Autoridade Nasionál Petróleu (ANP) no Korporasaun Finanseira Internasionál (IFC-sigla iha lian Inglés), organiza semináriu ida kona-ba enkuadramentu jurídiku no regulatóriu ba Kaptura no Armazenamentu Karbonu (CCS, sigla iha lian inglés) iha Timor-Leste.

Eventu ne’e, hala’o iha loron 10 to’o loron 12 fulan-outubru tinan 2023, iha Hotel Timor, Dili, konta ho partisipasaun husi Autoridade Marítima Nasionál no reprezentante sira husi liñas ministeriais, inklui Defeza, Interiór, Komérsiu no Indústria, Transportes no Komunikasoins, no seluk tan.

Objetivu prinsipál hosi eventu ne’e atu promove diskusaun kona-ba oinsá estabelese kuadru legál ida ne’ebé bele promove dezenvolvimentu ba projetu sira CCS nian iha país.

Inisiativa CCS ne’e nu’udar pasu teknolójiku ida ne’ebé krusiál atu hamenus tebetebes emisaun dióksidu karbonu (C02) nian. Timor-Leste fó importánsia boot ba redusaun ida-ne’e, liuliu bainhira kampu Bayu Undan besik ona atu remata ninia produsaun.

Ministru Petróleu no Rekursus Minerais, Francisco da Costa Monteiro, afirma katak, “mundu la’o hela duni ba deskarbonizasaun” no katak “teknolojia sira ne’ebé indústria petrolífera uza ho objetivu atu mantein produsaun petrólífera hodi garante redusaun signifikativa ba emisaun dióksidu karbonu iha ambiente”.

“Projetu CCS promete atu estimula ekonomia nasionál, promove kriasaun empregu no aumenta reseita ba Estadu. Permite apoia produsaun mina-rai, iha tempu hanesan hamenus emisaun dióksidu karbonu” dehan Governante ne’e.

Francisco da Costa Monteiro salienta tan katak “kampu Bayu Undan iha kondisaun jeolójika di’ak tebetebes, bainhira ninia operasaun sei remata” no katak “kondisaun sira ne’e maka adekuada ba kaptura no armazenajen ba dióksidu karbonu ne’ebé la defeni, iha futuru”. Nia hatutan tan katak “iha interese boot ida, la’ós de’it hosi Austrália, maibé mós hosi rejiaun ne’e, atu halo komérsiu CCS mai ita-nia nasaun”.