Primeiru-Ministru, Xanana Gusmão, partisipa iha Sorumutuk Altu Nível Dahuluk iha Forum Estadus Arkipélagus no Illas (AIS Forum, Archipelagic and Island States Forum) tinan 2023, ne’ebé hala’o iha Bali, Indonézia, loron 10 no 11 fulan-outubru tinan 2023.

AIS Forum maka plataforma ida ne’ebé kria atu halibur país illas no arkipélagu sira, ne’ebé la haree ba ninia rejiaun, dimensaun no ninia nivel dezenvolvimentu. Inisiativa globál ida ne’ebé halibur nasaun arkipélagu sira no illas hamutuk 51, hodi partisipa iha forum koletivu ida ne’ebé diskute kona-ba dezafiu hirak ne’ebé relasiona ho utilizasaun ba rekursus mariñus ho sustentavel ba kreximentu ekonómiku sustentavel, reziliénsia ba mudansa klimátika, poluisaun oseanu, jestaun emerjénsia no reforsu ba peska sustentavel nian sira.

Ho tema “Promove Kolaborasaun, hodi Permite Inovasaun, Ba Ita-nia Oseanu no Ita-nia Futuru”, eventu altu nivel ne’e halibur Xefe Estadu no Xefe Governu sira atu diskute operasionalizasaun ba solusaun teknolójika, inovadora no bazeia ba natureza hodi hatán ba dezafiu dezenvolvimentu no ambientál nian sira ne’ebé komún, tuir objetivu iha Ajenda 2030 ba Dezenvolvimentu Sustentavel, liuliu ODS 14. 

Primeiru-Ministru, iha ninia intervensaun, hateten katak “nu’udar priviléjiu ida hodi partisipa iha Sorumutuk Altu Nivel ba Dahuluk husi Nasaun Arkipélagu no Illas”, ne’ebé “ho objetivu atu promove kooperasaun no solidariedade atu ita hamutuk bele buka solusaun ba dezenvolvimentu sustentavel iha ita-nia Estadus no ba konservasaun tasi”.

“País hotu-hotu ne’ebé reprezenta iha-ne’e unidus hosi oseanu. Oseanu ne’e fó moris mai ita. Oseanu ne’e liga umanidade no fó mai ita identidade komún, dezafiu no ambisaun hamutuk”, hatutan Xanana Gusmão.

Xefe Governu destaka katak “hanesan maioria husi Estadus Illa Ki’ik sira, Timor-Leste maka vulneravel ba alterasaun klimátika no destruisaun ba ami-nia ativu (rikusoin) ne’ebé boot tebes – ami-nia ambiente tasi iha ninia diversidade no maravilla hotu-hotu”. 

Ko’alia mós importánsia ba Timor-Leste atu “finaliza ami-nia fronteiras marítimas”, hodi salienta akordu ne’ebé alkansa ona ho Austrália, “liuhusi prosesu konsiliasaun obrigatória dahuluk ne’ebé nafatin tuir CNUDM” no mós prosesu negosiasaun ne’ebé la’o hela “husi ami-nia fronteiras marítimas ho Indonézia, ho espíritu amizade no kooperasaun”.

No subliña mós kooperasaun ne’ebé eziste “ho Indonézia iha kriasaun parke mariñu ida ba jestaun sustentavel ami-nia tasi”, ne’ebé “ha’u hakarak parke ida-ne’e bele sai koñesidu hanesan Parke Páz nian, la’ós de’it husi ninia valór simbóliku, maibé mós atu reflete ninia importánsia iha konservasaun ba ami-nia biodiversidade no dezenvolvimentu komún”.

Primeiru-Ministru afirma katak Timor-Leste, “hahú halo promosaun ba Ekonomia Azul, hanesan dalan seluk ida ba dezenvolvimentu nasionál” no “inisiativa sira hanesan AIS Blue Hub, Sentru Investigasaun no Dezenvolvimentu no Índise Dezenvolvimentu Ekonomia Azul sei apoia ami-nia esforsu sira”.

Informa mós katak Timor-Leste hakarak “harii Sentru Investigasaun no Edukasaun Mariña ida iha illa Ataúru”, “ne’ebé situa kilómetru 30 de’it husi tasi-ibun ami-nia kapitál Díli, ne’ebé iha tasi ho biodiversidade boot liu iha mundu”.

Xefe Governu hakotu ninia intervensaun hodi salienta katak “fórum ida-ne’e hanesan oportunidade di’ak ida hodi hametin ita-nia ligasaun komún ho oseanu no serbisu hamutuk hodi alkansa dezenvolvimentu sustentável no konservasaun mariña” no hato’o ninia “apresiasaun ba líder sira Indonézia nian ne’ebé fasilita ona kolaborasaun entre Nasaun arkipélagu no illas iha ita-nia oseanu no ita-nia futuru”.