Nota Informativa kona-ba prosesu akizisaun kaderneta pasaporte eletróniku (ePassport)
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 11 fulan-outubru tinan 2023
Komunikadu Imprensa
Nota Informativa kona-ba prosesu akizisaun kaderneta pasaporte eletróniku (ePassport)
Governu reitera kompromisu hodi kompleta prosesu akizisaun kaderneta Pasaporte Eletróniku (ePassport) ho lais liután, no informa katak prosesu ne’e iha ona ninia faze finál, ho pakote dahuluk ne’ebé komesa entrega ona ba grupu prioritáriu sira.
Informa mós katak, iha tinan 2015 Ministériu Justisa selebra ona kontratu ida hodi fornese unidade kaderneta ePassaport hamutuk rihun 150, ne’ebé entrega ona husi tinan 2016 to’o 2019.
Ho hanoin katak, estimasaun ba impresaun anuál kaderneta ePassaport nian iha Timor-Leste maka unidade rihun 20, prevee katak stok ne’e sei garante iha tinan 2022 to’o 2023.
Iha tinan 2022, inisia ona prosesu aprovizionamentu foun ida ba akizisaun kaderneta ePassaport, prosesu ne’e labele realiza tanba difikuldade prosesuál sira.
Entretantu, iha finál tinan 2022, hafoin aeroportu loke filafali depois COVID-19, mosu aumentu solisitasaun ba emisaun passaporte liu média no ita la espera, nune’e maka hamosu fallansu iha prosesu emisaun pasaporte nian.
Nune’e, iha inísiu tinan 2023, Ministru Justisa selebra kontratu ida atu fornese unidade kaderneta ePassaport hamutuk 73.150, ne’ebé la kumpre tanba difikuldade prosesuál.
Atu solusiona situasaun ne’e, Governu Konstitusionál IX, ho desizaun Konsellu Ministrus loron 27 fulan-setembru tinan 2023, kona-ba aprovasaun atu ajuste diretu ne’ebé urjente, fó kontinuidade ba prosesu aprovizionamentu atu adjudika akizisaun ba kaderneta Pasaporte Eletróniku.
Pakote dahuluk pasaporte ba teste (pilotu) iha ona Dili no, tuir akordu ho relatóriu kona-ba impresaun pasaporte sira ne’e, rejista katak pasaporte ne’e emite ona ho susesu.
Husi pasaporte dahuluk ne’ebé simu ona, ho totál pasaporte 174, fó prioridade atu entrega ba pasiente sira ne’ebé presiza evakuasaun médika ba estranjeiru no sira ne’ebé akompaña, estudante, atleta no grupu prioritária sira seluk. Tuirmai, simu ona unidade balun, ho totál ezemplár 700, ne’ebé sei distribui ba grupu prioritária sira. No tuir faze, prevee iha tempu badak, sei mai unidade barak liután.
Tanba ne’e, hakarak informa ba ita-boot sira katak, prosesu akizisaun kaderneta pasaporte eletróniku nian iha ona faze finál, no ita hein de’it tuir faze pakote ba kaderneta ne’ebé haruka mai Timor-Leste, ho totál ne’ebé prevee ona maka iha unidade 73.840. Remata
