Ohin, loron 6 fulan-outubru tinan 2023, Sentru Nasionál Empregu no Formasaun Profisionál (CNEFP, sigla iha lian portugés) hala’o serimónia Enserramentu Siklu Formasaun tinan 2022/2023 nian no Inísiu Siklu Formativu foun, iha Tibar, Munisípiu Likisá. 
Durante eventu ne’e, entrega sertifikadus aproveitamentu Nivel I no II nian ba formandu hamutuk 215, entre formandu sira ne’e mane hamutuk 129 no feto 91, iha área Konstrusaun Jerál, Ospitalidade no Agrikultura. 
Atribui mós sertifikadu 48 ba formandu sira hosi Institutu Politékniku Betano, ba Formasaun Prátika Konstrusaun Sivíl no Estájiu Profisionál Pekuária nian.
Serimónia ne’e inklui abertura ba Formasaun Konstrusaun Jerál nian ba efetivus F-FDTL no Formasaun Unidade Marítima nian. Destaka katak parte husi formandu sira ne’e maka militár sira Komponente Naval F-FDTL nian, iha formasaun ida ne’ebé hetan apoiu husi Governu australianu liuhusi Kooperasaun Tékniku Militár DCP (Defense Cooperation Program). Formasaun ida-ne’e ho objetivu atu kapasita téknikamente militár sira ne’ebé sei asegura manutensaun ba frota Mariña iha futuru. 
Iha serimónia ne’e, lansa mós Fatuk Dahuluk ba Ofisina Polivalente, edifísiu ida ho andár rua ho ofisina versátil ida, ne’ebé bele adapta ba área oioin, kontein salas ba formadór sira no salaun konferénsia nian ida.
Sekretáriu Estadu Pekuária, José Vieira de Araújo, reprezenta Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha ninia diskursu, felisita no enkoraja formandu sira ba sira-nia integrasaun iha merkadu traballu. Destaka mós “kualidade inisiativa formativas CNEFP nian”, “iha área estratéjika oioin ba dezenvolvimentu nasionál hanesan konstrusaun sivíl, agrikultura no ospitalidade”. 
Aleinde Sekretáriu Estadu Pekuária, marka mós prezensa husi Diretór Jerál Sekretaria Estadu Formasaun Profisionál no Empregu, hanesan reprezentante ba Sekretáriu Estadu no Diretora Institutu Nasionál Dezenvolvimentu Maundobra. Embaixada Portugál reprezenta husi Adida ba Empregu, no Embaixada Austrália reprezenta husi Defense Cooperation Program.